Народный Собранин 20-пе сессиъ Дагъусттандин Правительствойин Председатель Абдулмуслим Абдулмуслимова пуне: «Дагъусттандин аваданвел асуллу э гIилмин аваданвелдилас».
Абдулмуслим Абдулмуслимова йиркIурал акьуне, 2022-пе ис Сергей Меликован икьрарилди адихьуне Дагъусттандиъ гIилмин ис э пуна. Мебурин кьастт и гIилмин аваданвел вартт акьас. Ме кар бадала акьуне семинарар, мастер-классар, повышенин курсар.
«Шиниккварин гIилмин аваданвел алтухъ акьас дахъуне «Квантариум» агъа технопарк, хъара Iуд «IТ-куб» агъа центрабура. ХIурариъ дахъуная 11 бицIи суман тупп дурхIа усар, хъара 43 воркаут-площадкабур. Махьтабариъ дахъуная 171 «точка роста» агъа центрабура», — ахъакьуне Абдулмуслимова.
Джурейи ме кардис фикир йине ахиран Посланиъ Федеральный Собранис хье хIуькуматин хIатти Владимир Путина.
«Культура ухIубан рекъуьъ ппара хIа мукь фая хе чIалав. Хьес лазимвел ая чIалан гьава ухIубан хье республикайиъ. Ме кардис ппара ул ачатуна кканде республикайин Миобрдира, хъара вузарира», — пуне Абдулмуслим Абдулмуслимова.
ЙиркIурал акьуне, ушу иса хье республикайиъ ЕГЭ ирцIан 30 шиникквди гъушуне 100 балл, хъара 3 шиникквди гъушуне мукьар ахиран Всероссийский олимпиадайиъ. МегIелимаринра шиниккварин кардин кьимат суман, хье хIаттин кумакилди, кьабул акьуне нормативный акт ирцIангъилди шиниккварисра мегIелимарис премибур 100 агъзур манат.
«Федеральный хъара республиканский программабурин кумакилди пул хъучатуна гъадивуне 87 джигагьар (43 махьтабар, 44 садикар). 1 сентябрьдихъас 2022-пе иса кар акьас хъучучIуне 21 цIае гIилмин идарабур (4 махьтабна 17 садик). КIилди кей ушу иса кар акьас хъучучIуне 24 гIилмин идарабур», — ахъакьуне Правительствойин Председательди.
2022-пе иса башламиш акьуне федеральный программайилди капремонтин курар акьас гIилмин идарабуриъ. «100 школ» агъа программайин маслихIетилди арайил акьуне махьтабарин ремонтар.
«Ме махьтабар арайил акьубан федеральный програмайилди Дагъусттан джаллабурин удигь гьая хье хIуькуматиъ.Ушу иса ме программайин кумакилди хье республикайиъ 4,4 миллиард пул ачатуна, батIар акьуная 210 идарабур, мисакес 191 махьтабар», — пуне Правительствойин Председательди, хъара чугъсагъул пуне джалла депутатарис, алгъузуна ме кар кIили файшуттарис.
Хъара хабар акьуне, хIуькуматин идарабури хIел аркья программайилди садикарин капремонтар акьубан суал.
Ахирахъди Абдулмуслим Абдулмуслимова гъургъуне махьтабариъ ирцIан куче ямагарин гьава фиштти айчин.
Батитай Габибулаева
