29 июнь — партизанарин-игитарин ягъ

Партизанаринра подпольщикарин ягъ — цае ягъ э календарьдиъ хье хIуькуматин. Ме ягъ хьас авалан багьанабур ая. 29 июньдиъ 1941 иса аттархьуне директива Совнаркомдин СССР ЦКдинра ВКП(б) партийный просоветский идарабурис дегIви ая хье хlуькуматин регионарисра, районарисра. Директивайиъ пуна уйи душманди фацуна ая джиларил аркьагъилди партизанарин отрядара, диверсионный группабури душмандин армихъай дегIви акьас, душманарисра гин илдешарис ккихас давере гьава, гьер Iамайиъ хъиркIенгъилди гебурихъ, гебурин курар арайил даверегъилди. Подпольщикаринра партизанарин группа акьас кIилиъ адеф дегIви хъучучIухаб э. Мегунасттегьен кьацIра фикираракегьей ай хьуна адава хIуькуматин хIаттарин партизанарин движение акьас. Гебури агъай ахьуная, душман адичин, хьин ге адикуна тин джилил акьасе дегIви, иъра чIукь адаверегъилди, адайшу иъра тин джилил адаверегъилди. Амма партизанарин отрядар акьуф ппара кумак хьуне. Мебур акьуф, душман нандиъра сакинди артай хьундава. Ме карди ппара алзийине гитлеровцыбурил. Суьре исалас Директива аттархьуне, 1941 исан ахирахъди, партизанар хьуне 90000 инсан, партизанарин отряд — 2000 вартт. Партизанарин движенибурин яI хьуне «Центр» агъа армибурин группа — джалла Белоруссия, Брянщина, Смоленщина, Орловщина. Агъзурар подпольщикари кар аркьай хьуне Украинайиъра, Прибалтикайиъра, Крымдиъра, РСФСРдин кьибла багухъра. Са чIалалди, подпольный партизанарин движенибури ацIуна уйи джалла немцарихъди хъая багв — джемеIетис фи акьунара кканди адавуйи немцарив хIавел фай, джемеIетин хаб ккеттаркуб ппара кьуват хъафра хьуне, зурбадалди хьуне.
Партизанарин хаб ккеттаркуб Великий Отечественный дегIвиъ хьуне хье дадарин партизанарин гIедатар — хье халкь вардишди адавуйи душман ватандин джилил ами атас.

Расим Гучудадов

Добавить комментарий

Ваш адрес email не будет опубликован. Обязательные поля помечены *