Российин Президентин администрацин хIаттин садпе заместитель Сергей Кириенко адине кардин рекъуьас Дагъусттандиди. Ме кардихъас хабар акьуне республикайин хIаттин врио Федор Щукина.

 Мин кардин рекъ башламиш акьуне Махачкалайихъас, ме вакилари ахъийине Расул Гамзатованра Магомедали Магомедован гумбатарихъ тукар. 

"Магомедали Магомедович Магомедов - ппара ттур ая инсан э хье республикайиъ. Ме кIилиъ гъузуна кьабул акьуфе хье ке герек хIуькуматин гIедатар. Хъара 1999- пе иса Магомедали Магомедовича агвар акьуни учис кканевелна зурбавел Дагъусттан бадалди гъузуна душманар гъамаз хьугуна", - пуне Федор Щукина. 

Дагъусттан гьалра арайил вей аме хьидана угъалари йи зарарикес. МисеIети инсанари ккегъдивая чиппин хулар мукьар, мебурис ирцIанди ая пулар. ХIаттин вриойин командайи ппара джафа дивай кар аркьая ме читин вахттуниас аттивас инсанар.

 "Дагъусттандин аваданвелдихъас гъургъуне Российин Президентин администрацин хIатин садпе заместитель Сергей Кириенко. Гьалдихъас хабра арайил аркьая лап хIа проектар, хIел аркьая гьер джуре суалар, ке герек идеттар дагъусттанагьлибурис. Нуш э Сергей Владиленовича йи кьимат угъалари зарар йи мукьар ккегъдивубахъас аркьа курарис. Гьалдис хIа пай курар акьуна ккиркIуная, социальный объектарна хулара гъадивуная зарар йи районариъ.

 Хъара Сергей Владиленовичас ахъакьуне хье цIае "Команда Дагестана" агъа кадровый программайихъасра. Конкурс акьуна гIаттива кар акьас гIешкъра ай хIезурди аяттар хье республикайин хайир бадалди. Ме конкурсдин иштаракчибурихъай собеседование гъарефра зун э. Джалла арайил аркьая иджвелин курарис федеральный центрди майилра аркьая. Хье джаллабурин кьастт э - гьеме хье Дагъусттандикес акьас мукь джаллабурис яшамиш хьас кканеф, инвесторарис кьабул идеф, хабра адис гIешкъ вереф гIуларисра", - пуне Федор Щукина. 

Джалла усариъ суман Дагъусттандиъра ая арайил хьу курара, акьас ккиме курара. Ме курарихъас Сергей Кириенкойи ишттарак аркьая совешанил ахъакьуне правительствойин вакилари. 

Гьер са хIатти учи кIили гъаре кардин читинвеларихъас ахъакьуне, саддалара ке герек идеттарихъас инсанарис. 

Мисаъ гъадивуне суалар Iекварихъас, строитель ствойихъас, ТКО-йихъас, туризмдихъасра. Ке Iайи читин кар хьуная республикайис, саддалара Махачкала шагьурдис - Iекв кетуб. Хье меркезиъ 50% дегьен Iекварин синар иджи адава. Ме 2026- пе исан ахирахъди батIар акьас йиркIураъ ая 33 фидер, мебурикесра 22 гьалдис дуз акьуная. Амма ке читинди ая, дуз дакьуна аме 39 фидер, гьемебурил э 80% Iеквар хъадихьубра алчархьаф. Мебур батIар акьуб э агьал ке герек суал. 

Сасра герек суал э - хъара якьу подстанцисара гъадивуб, фас пучин аяттарил ппара хIа гудж алдея. Хъара гъадивуне суал ахттигьар адавай хулар гъадиваттарихъас. Хье республикайиъ 2,5 агъзур объект ая мишттинттар, мебурикес 910 ппара мартабарин хулар. ХIа пай хулариъ яшамиш вей инсанаракехIей ая, идехIела хьудегьен инсанарин ахттигьарар ухIуна кканде. ДехIела ме кардис чин ппара фикир ирцIандея хабдира мишттин курар уликкес ккеттдархьас. Арайил акьас алучIуная ТКО-йин курара, туризмра, сельское хозяйствора хъара сасра герек курара авадан акьубахъас. Сергей Владиленовича ппара ухьтан мукь э пуне хье Дагъусттан, хIезурди ая пуне хье республика авадан акьуб бадала майил акьас.

Батитай Габибулаева