МегIрака хъучучIастти, республикайин хIатти мисал завал хьуттарис насихIет йине гьер исан Дагъусттандин коррупцин кьайдабурин социологический ахттармишарин ягIарвелар кардин рекъуьъ ишламиш акье пуна.
«Ме статистикайин кьайдабур гьакIанди ягIархьуб дава кканди аяф, ягIархьу суман мебур джемеIетин уларилди суман агуна ишламишра акьуна кканде. Нагагь инсанарис шулугъар, чIире курар мукьуйил аргвахаб, са отчетира е кумак акьасттава, е эхIттиб хъихьасттава антикоррупционный сиясат авадан хьасе пуна. Ме ахттармишарин ягIарвеларихъ хъая мукьарил дузди кар дакьуб, ме дуздававелар хьин гьадихьуна кканде. Къанунилди коррупцин диб ккедихьуб хье джаллабурин удигь гьая суал э. Гьемиштти идехIела ме суал хIелра акьуна кканде хьин джаллабури Дагъусттандин прокуратурайихъай сад хьуна», — пуне Сергей Меликова. Региондин хIаттин чIаларилди, къанунин шулугъар Iари ягIар акьуна, тахсир кеяттис джаза йиб дава лазимди аяф, — мебури хъедикIи манатар хаб гьикунара кканде бюджетиди, хIерамин пуларилди гъушу шейэра фаттивуна кканде, рашва йина арайил акьуна хъитIу курарин икьрарара кьатI акьуна кканде.
«Гьемиштти джаллабур сад хьуна кар акьучин дала удигь багв фацуна сакин акьас хьасттава джазайигьас дагучIай нехIекь курар аркьа нехIс инсанар», — пуне Сергей Меликова.
КIвал акьуне, Iайи сивил алгъархьуна, кIилдибурис хабар иде уголовный курарин силис дива хIекьдан далилар гьучагъай, ахттармиш аркьай. Мебур э: ппара квартирабур ая мартабарин гьава дараматар гъадивас ахттигьар ирцIанттарихъас, ме кардис джил арайил акьубарихъас, хъара ме курарис лазим иде — дава задар гъушубарихъас, хIуькуматинра муниципалитетарин мухIтаджвел ая курарихъасра. Социологичнский ахттармишарин доклад фай гъургъуне РД-йин Главайин, коррупцин суаларин Управленин начальник, Ражидин Эфендиев. Акьу ахттармишари агвар акьуне, хабар гъушудегьен дагъусттанагьлибурин якьу пайунин са пай корупцин курарис акси э. Корупция кьабул дакьубан пропаганда цIуппе акьуб бадалди, Эфендиева гьучихьуне, хьудегьен хIеракатилди джемеIетис ягIар акьуб, нагагь коррупцин шулугъарикес унихьучин мебурис ягIай ахьас найич, фиштти хабар аркьайчин. Арайил акьуна кканде цифровой технологибур. Мебурикес кумак хьасе суалар хIел аркьагуна инсандин фигIил гьадихьас. Ме кардин рекъуьъ прокуратурайи кIили гъаре мегIракабурихъас ахъакьуне, республикайин прокурордин и. о. Алексей Родивилована РД-йин внутренние делабурин министр Абдулрашид Магомедова.
«Къанунилди давай, коррупцилди кар аркьаттарин удигь багв фацуб бадалди правоохранительный органаринра властин органарин алакъа давам акьасе. Ме рекъуьн чIlире курарна шулугъар лап джинди аркьа, амма халкьдин камаллувелди Iемал фидегьен ирхе хьучира ахир кIил джиркIенде», — тайрикь акьуне Сергей Меликова. Совещанин рамкабуриъ ай хIайи фикир йине дарар, дарарин джилар ухIубан курарис. Дарарин фондунин джилар, хIел ягIай ишламиш акьуна кканде. Республикайин хIатти джурейи агвар акьуне муниципалитетарин хIаттарин джувабдарвел, чиппин гъиликк ккея манзиларихъас. ДжемеIетив фая джилар лазим идегъилди ишламиш дакьубахъасра. ГIилминра ариш — варишдин рекъуьъ коррупцибурин шулугъарихъасра.
Салихат Малагусейнова
