Аваладин вахттари са сувал але хIуриъ яшамиш вей ахьуная ЭхIмад агъа идеми. Михъ фушра багунттара хъахьуна адава, е хулаъра фера ахьунадава мин. Салаъ аве маларикес тек са Iуссе хIейван хъахьуная михъ. ХIуринттари Мискин ЭхIмад агъай хьуная мис.
Фера хъудайчира, ми учин хIейван фай уч суман касиб инсанарин бицIицIуьре курар аркьай:тебурин бицIи хуппур даркай, калтуфарис ругар ицIанди, рагIуди кьур ругIас гъай, учин кIил ухIай хьуная. Курар сакинхье вегIдайи ми хIейван Iуьшари чIириди адикай хьуная, са муз ичира якк фацурай пуна. Iу хIефттайи курар даркьай, адикаячира, мин хIейван кьацIра кук хьуна адава-хъара Iайи забун хьуная, утунил йирхIунара хьуна агуная ЭхIмадас.
Дард хьуная мис: фи эгьан зе хIейвандис акьунаяф пуна. ЙиркIвурастти кьастт акьуна, кIилин Iуьштти агьутIуна ягIар акьас кканхьуная мис фи ичин ме IуьтIанас адику вегIдайи мис мушат аркьаф якк фацанас.
ХIейван чIирилди фатуна, уч са азман гъвандив афучIуна, джинихьуная.
Суьре Iуьш алттушу арайи хIейвандигьди завал хьуная вехIши нахширар: хIучна, багнишна вакк. Гебурихъай сулра бадил хьуная. Джаллабури акишай, дурхIай, хIейвандин утуниъас ханчIар адайхIай хьуная, кьацIра ми IуьтIанас адартай. Хъел адина, тебури аркьаттар агуф, фадишина гъвандифас, фацуная ЭхIмада хIейвандил хIевалат хьуная нахширар.
ГучI хьуная нахширарис Мискин ЭхIмадагьас, миннатар аркьай хъчучIуная мебур чаб даради фат агъай
— Зун ве раккахъди са кIаратI хIуппарин хъучикасе,- пуная хIуча.
-Зун ве ху муссу суман акьуна батIарди даркасе,- пуна, гаф йиная ваккала.
-Зун вас дарагI гIая уьтта гIан ацIуная ерсе хIа кIур агвар акьасе, — пуная багниши.
-Фи э вас закес кеттархьаф? Фат сара зун. Мус хьунара са четин вегIдайи кумак хьас идеф хьасе вас закес,- пуная сула.
Фикирар акьуная Мискин Эхмада, фикирар акьуная. Хъугъуна тебурихъ фатуная, ми джалла нахширар чиппин рекь акьуна. Кьабахъ ягъа багамис хIуча, унахъуна, са кIаратI хIуппарин хъучикуная мин раккахъ. Ваккала учин кканччарилди мин ху даркуная. Абкьанин вегIдайихъди суман багнишра адиная мис даради вес шаб агъай, уьтт аявус агвар акьас. Завал акьуна тидас-мидас уьтт ихьа кечIара , са хIуьтте якIвра гъушуна, ушуная ме багнишихъай даради. Гьучарукьуная мебур са уьтт кевея хIа куранигьди.
-Гьал зун вун Iуьджуна кина, IуьтIанасе,- пуная мис багниши.
ГучI хьебаас, Мискин ЭхIмадан гъиларифас фаттархьуная якIв.
Ме Iуьрджанди ая вахттуни, са гьава джилир унихьуная мебурис:
-Мискин ЭхIмад! Мискин ЭхIмад! -агъай.
-Зун магьмисаъ ая,- пуная Мискин ЭхIмада,-сулан джилар ягIар хьуна.
-Мискин ЭхIмад, вас багниш агунеф? Мич гIурчахъанар вея, тебурис багнишин кьудакь лазимди ая. -ЯгIай дава уп, ягIай дава уп,- агъай миннатар акьуная мис багниши, гучI хьуна.
-Агундава,-пуна гьараяр акьуная Мискин ЭхIмада.
-Ппай фие ле ве удигь гьагъутIунаяф?- пуная сула.
-Рукъу хIа тIаб э уп,- пуная мис багниши.
-Рукъу кIуранин хIа тIаб э сара,- пуная МискинЭхIмада.
-Рукъу тIабул ибрар алвев?- пуная сула.
-КIуранин кулар э уп,-пуная багниши.
— Гебур кIуранин кулар э, пунаяМискин ЭхIмада.
-Айчин, гъушуна ле вав фая хIуьтте якIв, гьеле куларин арайигIди суман батIарди фачихь,- пуная мис сула.
-Гъушен якIв, яваштти йирхI. Зун вас хъара ппара уьтт аявус агвар акьасе, зун вахъас хъагъишайра акьасе, — пуная мис багниши.
— Сара зун вахъ хъугъай андава,- пуна, гъагьихьуна батIарди якIв, ихьуная Мискин ЭхIмада багнишин кIилиъ.
Багниш алдутIуфна сад, гIаттиная даран куларигIас сул. Iударира хъай ацIас акьуая мебури ЭхIмадан чIекIер уьтта. Фай гьете уьттра, адиная мебур хулади. Учис кканегъилди дуламиш хьуная тегунан хаб Мискин ЭхIмад. Фиттихъра муьхIтадж давай, къуни-къуншибурисра гъил гьучихьай: учихъ хъаяттар тебурисра пай аркьай, нуьхIуьбат-баракат ай яшамиш вей аме гьалра.
Тамам Рамазанова
