Цул итталар бадил вере вахтт э
Ме иса дуньяйин гьавабурин ппара духIубавелар хьуне. Сифтта Iурдихъай адине аязар. Хабди хьид хьуне инсанарис Iеламатар агвар аркьай, угъуне ибхьер агу уларис Iеламатарна тарихардегьен.
Ппара гагь хьуне дуньяйиъ ачухъвел адай гIул адичира. Гьегиштти гьуркIуна ибгIавел дахьуна цулра хъучадине. Цули учин гьунарар агвар акьуне.
Октябрьдин вазалан сифтта ягъари угъуне ибхьер хьуне цIуппе аязар. Миштти дуньяйин гьавабурин духIубавелар хьугуна гьер джурайин итталара ппара бадил ве. ХIа пай итталарин раджар гIедат идегъилди гъайша цулана. Инсанарин имунитетар чIукь хьу вахттуни. Цулана ухIуна кканве эхIттият мекI дахьас. IуьтIанас ишламиш акьуна кканде джандис хайир кея сурсатар. Агьалдин вахттари аптекабуриъ ккане джурайин дарманар витаминар ая. Дуканариъ ккане джурайин таза емишар Iеле шейэра аве. Амма итталар гьегиштти хабар давай гIаттве. Авалдин вахттари итталарис рехIми акьас дарманар витаминар гъушанас мункинвел авейдавуй. Мишттин вахттуни итталис кумак хьас сифтта ишламиш аркьафи хулаъ ая, хъая сурсатар.
Некк садпе сурсат гъиликк ккея, ишламиш аркьа зад ий дармандис гьер са итталис. Гьелбетта некк ишламиш акьас иджи э уцуна. Хъара иджи э неккдин ракь.
КIвал акьасе авалдин вахттари ке идже дарман итталис ий, вахттуни чIих алгьатуна неккдил акьу музе хинкIар. Хъара кумак вейи мухур хъархьугуна, кьуркьар иттархьугуна гIатуна неккра, гIахъуна содара алихьуна батIар химхе ччамун къадакъра ухугуна. Неккдикес акьас ве мастт, мутал, ччам, джар, нис. Мебурикра гьерттик учингъилди хайир кея джандин сагъвел ухIас, иммунитет цIуппе акьас. Гьелбетта Iари неккдик муш кейра экьуна ккандава, лазим вахттуни духттурарилдира ушуна кканде. Лазимвел айчин рубра йирхIуна кканде, дарманара ишламиш акьуна кканде гебурин ая тIалабарис, аркьая къадагъабурисра фикир йина иджи э. Гьемиштти гьертти учин сагъвел ухIучин инсанарин арайиърва сагъвел афухIас хьасе.
Наиба Гасукаева