Каспийск шагьурдиъ хъучучIуне «Знамя Победы» агъа автопробег.
Ме акцин рамкабуриъ ай хьуне знаменной марш, дахъуне Знамя Победы суман хIа пайдагъ, хабди хъучучIуне автобробег.
Ме Гъалибвелдин Ягъан символарилди батIар акьу машинарин колонна весе кIилди Дагъусттандиас, хабди Северный Кавказдин джуре регионаридира ЮФОйидира весе. КкиркIвасе Волгоград шагьурдиъ.
Фасе «Знамя Победы» агъа акция Дагъусттандис мидегьен лазим идеф?
Фас пучин ме пайдагъ Рейхстагдил гъадивуф хье дагъусттанагьли иде Абдулхаким Исмаилова э. ЯгIа ме пайдагъ хабра эскерарин гъилив фая Российин пайдагъихъай СВОйиъ.
Сергей Меликован фикирдилди арайил акьу акция ахиран исари гIедат хьуна кIили гъая гьер иса. Ттиъ ме дахъуная 45 муниципалитетиъ, ишттарак аркьая мисагI верш агъзуралас вартт дагъусттанагьлибури.
Ме «Знамя Победы» агъа акция дархъа мегIракайил Сергей Меликован багулив фай уй Дадарин ХIа дегIвин ветеран Багаудинов Муса Мусаевич. Дагъусттандин хIаттин пресс-службайинра хабарарин сиясатин управленин хIатти Рашид Акавовича ахъакьуне автопробег вере рекъерихъас. Мебур весе СКФОйинра ЮФОйин регионариас, ахир кIил хьасе муядпе майди Мамаев Кургандигь.
Агъул райондин хIатти Закир Каидовара ишттарак акьуне «Знамя Победы» агъа акцигI.
Меликова учин хъугъуб хъая пуне ме пайдагъ хьес гьал багу вере Гъалибвелдинра ке багьа ишан хьасе пуна. КIвал акьуне Владимир Путинан чIалара: «Ишанар гьер джуьрабур аве, хьес багьа э ме ишанарин мегIна. Ире пайдагъин мегIна хье тарих э, авалдин, гьалдин, хабдин. Ме тарих хье кIилдибуринф э!» «Хьин дамакъ аркьа хье Ватандин гуджлувел, гьававел, зурбавел, векIехIвел алтухъ аркьаттарил, халкьдин ислехIвелна сакинвел ухIаттарил. Хьес ягIа хьин хIекь идеф! Душман тарг акьасе. Гъалибвел хьеф хьасе! Гъалибвелдин Пайдагъ хье дадари хIададари суман хьинра лап гьавайи гъадивуна гъасе!» — пуне Сергей Меликова.

Салихат Малагусейнова