26-пе майди Минеральные Водыбурин «Минводы ЭКСПО» агъа Миллатарин выставочный центрдиъ, Кавказдин инвестиционный форум кIили файшуне. Дагъусттандин делегацин кIилиъ ай уйи Сергей Меликов.
Ме форумдин площадкайил КИФ2025 агъа джигьиларин программайилди гьер джуре мегIракабур хьуне. Ме джигьиларин ягъа 1000-ралас вартт ишттаракчибур сад акьуне. Мебур э: — студентар, джигьил пешакурар, предпринимателар. Мебур джаллабур са усал завал хьуна, гьертти учифас вере кьут гIачихьасе Северный Кавказдин гъванкIар багулин аваданвелдигI.
«Кавказдин инвестиционный форумди мус хьучира ппара фикир ирцIанде джигьиларис, мебур хье багайин ягъан духIубавеларин кIил э. Че хъугъуб хъая, чиппин диревелна, зигьинлувел фая джигьилари дала сара сайира хье ватандин иджвелна аваданвел алтухъ акьуна кIили гъасттава пуна.
Гьемиштти идеф ягIа хIела идетаре гьергалай ме форумдин программайигI кьацIра духIуба даркьай джигьиларин ягъ гIаяф. Ме ягъахъди ул ачартай агъзурарилди ишттаракчибур завал ве. “Час джигьиларикес Iари экономикайис гъил гьучихьуб дава лазим идеф, хъара мебурин хIа фикир хъай, региондин аваданвелдис муфеIет кей арайил аркьая проектарис ирцIан платформара э”, — пуне Росконгресс Фондунин директор, Кавказдин инвестиционный форумдинра директор иде Владимир Затынайкойи. Хъара ме Форумдин площадкайил, мегIракайин гIуларис выставкайин экспозицияра дахъуна уйи. Выставкайил агвар аркьай уй гьер регионарин, хIуькуматарин, хъара Северо-Кавказский федеральный округдин курар арайил аркьая коммерческий компанибуринттар иде къана сад стендар. Чиппин инвестиционный проектар агвар акьуне Дагъусттан Республикайи, Чеченарин Республикайи, Ингушарин Республикайи, Северная-Осетияйи (Алания), Кабардино-Балкарияйи, Карачаево-Черкесияйи, Ставропольский крайди, хъара Абхазин, Южная Осетин, Адыгейин республикабурира. 
Ме кардин программайигI кIилди гIачихьуная 50-цIур мегIрака. Мебурикес ке хIа вакъиа э Российин Федерацин Правительствойин Председательдин заместитель, Александр Новак гIая пленарное заседание. Хъара КИФ-2025-дин рамкабуриъ ай хьасе Северо-Кавказский федеральный округдин социально-экономический аваданвелдин суаларин Правительствойин комиссин мегIракара. Хъара ул гIачагъа форумдин ишттаракчибурин UFC-йин чемпион Ислам Махачеван поясдира, мера гIая экспозицибуригI. Махачева ме пояс багъиш акьуная Дагъусттандин спортивный музейдис. Спортин министр Сажид Сажидова кIвал акьуна файдиф э ме КИФ-диди. Ме ягъан ке хIа мегIрака хьуне Алексанр Новак кIилиъ ай хьу «Образ СКФО в 2036 году» агъа пленарное заседание. Ишттаракчибурин фикир хьуне яраб фишттинф хьасегьан СКФО 11 исалас пуна. КIвал аккьасе Кавказдин инвестиционный форум — СКФО-йин регионарин экономический потенциал агвар аркьа площадка э. Ме Форумдин ишттаракчибуригI гIай уйи федеральныбура региональныбура хIа гьулар, Российин халкьарин инвесторар, ариш — варишдин вакилар, хъара джуре экспертара.
Салихат Малагусейнова
