Дагъусттан республикайин Каспийск шагьурдин «Анжи Арена» агъа стадиондил 2025-пе исан майдин вазалан 15-петтилас 17-петтилдегьен юбилейдин 25-пе выставка хьуне Российин джинсунин хIуппаринра цIегьерин.
Ме вахттуни мугьлат йисе гIуларисра, дагъусттанагьлибурин гIулар кьабул акьубас кьимат йина, хъара са вегIдайилас хаб мич адес кканхьас.
Республика хIуппар ухIубан рекъуьас ая ке кIекIуъ. ГIуьфу миллион вартт хъая хьехъ мебур. Джалла ишттаракчибурис ме кардикес муфеIет хьурай, ватандин хIуппар ухIубан рекъуьъ хIа агалкьунар къазамиш акьас. Гьеме хьибу ягъакес чвас хIа кумак хьурай дагIаф ягIар акьуна, ягIаф тикрар акьуна хайир кеттивас», — пуне ишттаракчибурис Сергей Меликова.
Ме мегIрака арайил акьуна, кIили файшубагI ишттарак акьуне хIа гIелимари, К. А. Тимирязеван ттуранихъ хъая РГАУ-МСХА-йин асперантари, выставкомдин председательди, Россияйин гIилмин академин академикди, хIурин магIишатин гIилмин духттурди, мал-къарайин яккунра неккдин кафедрайин профессорди, Амерханов Харон Адиевича, ме уч э Россияйин гIилмин академин экспертный советин председатель, академик, хъара заотехнийин пешакурарин кафедрайин профессорди Юсупжан Артыкович Юлдашбаевара.
Ме выставкайил агвар акьасе 12 региондиас 65 джинсунин хIуппарна цIегьер ухIа хозяйствобур. Мебури мисаъ агвар акьасе 400 вярш хIуппарна цIегьер.
ВыставкайигI ишттарак акьуне мал — къарайин, мебурин джинсарин гъавурдиъ ая пешакурари, региондин АПК-йин идарабурин вакилари, сельхозорганизацибуринра К(Ф)Х-йи, хъара профильдин гIилмин идарабурин пешакурари. Ишттарак акьуне мисагI Дагъусттандин хIатти Сергей Меликовара. Мич адиная гIуларисна ишттаракчибурис хуш багъш акьуна гъургъуне Меликов Сергей Алимович, РФ-дин хIурин магIишатин курарин министрБоровой Максим Владимирович, Республикайин Правительствойин Председатель, хIурин магIишатин курарин гIилмин духттур Абдулмуслим Абдулмуслимов Мугудинович, РАН-дин академик, Миллатарин хIуппар ухIубан союздин президент Амерханов Харон Адиевич.
Гьеме мегIракайин рамкабуриъ ай хъара хьуне тематический круглый столар, гIилмин-практикайин семинарар, мастер-классар хъара гьер иса кIили гъаре, Миллатарин хIуппар ухIубан союздин заседанира. Ме хьибу ягъан арайиъ, РАН-дин академик Юсупжан Юлдашбаев кIилиъ ай Российин независимый экспертари кьимат йине мисал агвар акьу джинсарис. Мин чIаларилди гьемишттин джинсарин хозяйствобур арайил акьуна, яккун, неккдин, хьеярин кардин рекъ авадан акьас ахиран исари ппара загьмат дива.
Выставка кIили файшубан кьайдабурихъ хъуттурфуна ай уй мисаъ джавизарин мукьара. Са хIуьджатра адавай садпе мукь хьуне Дагъусттан республикайин Тляратинский райондин «Джурмут-1» СПК-йис. Джавиз хьуне мебурин диплом I степенира Lada «Niva Travel» агъа машинин гилегвра.
Республика Дагъусттандин хIаф Сергей Меликован ттуранин джавиз, Lada «Niva Travel» агъа цIае машин йине Ставропольский крайдин «Племзавод Вторая Пятилетка» агъа селекционно-генетический завод СПК-йис. Ме Выставка арайил акьубан кьастт и джинсунин хIуппар ухIубан таджриба ягIар акьуб. МегIракайи агвар акьуне российин селекционно-племенной курарин машгьурвел. Юбилейный мегIракайис фикир йина, мич хьибу ягъан арайиъ адине 50 агъзурахъ хъучархьуна инсанар.
РД-йин Правительствойин Председатель Абдулмуслим Абдулмуслимовахъайна вицепремьер Нариман Абдулмуталибовахъай ишттарак акьуне ме юбилейдин мегIракайигI хье Агъул райондин хIатти Закир Каидовара.
Эл ккетубан рекъуьас ишттарак акьуне райондин ЦТКНР-дин пешакурарира. Мебур э, Роза Ахмедова, Кевсар Тагирова, Аминат Алиева.
Салихат Малагусейнова
