Инсан дуьньяйил яратмиш хьунахъасхаб вардиш э кардихъди.Гьер са кар инсандин са пеша э. Хье дуьньяйиъ ппара гьер джурейин пешабур ая . Гьер са пешайин лазимвел сайишти джуре э.
Хъара гьер са кардихъ, пешайихъ хъая мегIелим, кардин гъавурдиъ ихьаф бегьем пешайин эеси хьас. Эгена гьер са касдифас суал алихьуна хабар гъушучин, найе пеша ке лазим ичин, джуваб йисе гьерти гьергъилди. Амма зун хIисаб аркьа, хIапайярин джуваб сад хьасе, кIилди хье дуьньяйиъ ая пешабурикес ке лазим пеша э мегIелимдинф пуна. Ме пешайин лазимвел, кьимат хIа э, фас пучина, сифтта баба гъил фатуна шиниккв махьтаби ачикухаб, ке удигьай мин гъил фарцанф гIилмин рекъьуъ ихьаф, тарбия ирцIанф мегъелимди э. Гьемишти пеша учис гIативуне Гусейнова Муфинат Абдулгалимовнайи. Муфинат Абдулгалимовна хуф э Агъул райондиъ Гъваарин хIуриъ хIа хизандигI. КIилди мебур хизанди уйи муя шиниккв. Дада мин кар аркьайхьуне рекъерил, баб калхоздиъ. Шиникквари гьерти гIаттивуне учин йиркIурас кьабул хьу пеша.
Муфината гIаттивуне мегIелимвелдин хурубар. Махьтабиъ Муфината хуруне муядпе класс ккиркIвасттегьен, хабди ме учIуне хурас Дербентиъ Педагогический училищейиъ. 1972-пе иса, ккиркIуна мегIелимдин курсар, адине ме кар акьас Гваъди. Махьтабиъ кар акьуне Муфината гIуьфцIур истти. Кар аркьая вахттуни гьемис йине чугъсаулдин кIеджар, джавизар.
Муфинат Абдулгалимовнайин чIаларилди, мегIелимдин пешайин вазифа ппара хIа э. Фас пучин, ве хулаъ ая шиникквдихъай суман йиркIв фай, сабур хъай кар акьуна кканди ая. Хьес джаллабурис ягIа аркьая кардин хайир, кьимат, ахир кIил асуллу э ахъаджихIубалас. Гьелбетта, зун хурубар йина шиникквар ягIара зе йиркIураъ ая.
Миштти идегуна, Муфината дарс, тарбия йина шиникквар ягIайин ягъа ттур ай кар аркьа мегIлимар э.
ЯгIайин ягъас Муфинат Абдулгалимовна, кардилас айчIуна, рукьая гьунарилди учин хула ая. Учи хъая гIуьфу шиникквдисра йине хIа хурубар. Шибер Муфинат Абдулгалимовнайин ушуне бабан рекъьуас.
Сагъвелар хьурай Муфинат Абдулгалимовнайис!
Наибет Гасукаева