Пешабур хье Iуьмурдин рекъуьъ хьес ппара гьучархьа. Гьер са мискьална-зар дегьен кар пеша э. Дуьйин варттал инсандин хьил бадил хьухаб мич хIатти бицIиттис гьертти учис ягIаф ягIар аркьай алайшу макан э ме. Миштти пугуна гьелбетта Iари гIилмин рекъ агъа чIал дава, фишттинф кканчира кар — пеша Iеле ямаг, ягIа ахттилат, чиппин усттавелар. Те вахттари мегIелим, дарс хура шиниккв агъа чIалар адавуй, гьер са цIае кар ягIар аркьаяф мегIелим хIисаб ий. Гьучихьучин кьанди э махьтабар, мегIелимар арайил хьуф. МегIелимдин джафайихъай барамбар э гьер са махьтабиъ ме джигагьар мертт аркьая дишагьлибурин джафара. Мебурисра махьтабикк ккея шиникквар мегIелимарис суман багьара ве, кканра ве. Фас пучин мебурира шинккв махьтабиъ аядегьен гагьди мебурин махьтабин IуьмурдигI лап йркIв фай иштарак аркьа. Чиппил алчархьу насихIетна тарбияра ирцIанде, дагIаф ягIар акьасра, ягIаф тикрар акьасра алучIа, маркьа — меванна эркьва усра ягIар аркьа. Зас пас кканди ая, чаб гьеммишанди мегIелимарин эхъуьникк ккейчира ме инсанарин вазифара лап лазим э шиниккварин, мегIелимвелдин пешакурарин, кIилин махьтабинра Iуьмурдин рекъуьъ. Са чIалалди шиниккварил йиркIв, Iешкъ алдава инсандифас махьтабин кар багура кехIей акьас хьасттава. Гьемиштти махьтаб бадалди ягIайин ягъанис, хьибцIурна якьу истти махьтабин мерттевелдихъас йиркIв фай лиху дишагьлибурикес сад э Давудова Фаизат Исмаиловна.
Фаизат Исмаиловна (гьер вахттарин шиниккварин арайиъ нуьхIуьбат — хIуьрматилди Фаизатччай) са агъзурна ерчIу вершна ерхьцIурна ерчIудпе исан цIеерхьидпе октябрьди Агъул райондин Типигъарин хIуриъ Башибурин ИсмиIиланра ХIуьриперин хизандиъ хуне. Хизандиъ ай уй мебурин ери шиниккв гIуьфу чура Iу чи. Дад банкунин къаравул ий бабра больницайин палатабур мертт аркьаф. Гьелбетта дадна баб кIилил алме вахттари джаллабурин шиниккварис суман е гьей адавай е гьуй адавай дуья мебурисра Iекве ий. Миштти пучира хIа хизан ухIас лидегьен рехIетра давуй. Амма дадна баб дахи кIина мебур амилгуне садтти. Ме вегIдайи читинвелара мебурис зайдайи агуне. Фас пучин чиппи дакьуф мебурис фера джиркIенди адавуй. Са чи дала эвлелмиш хьуфра адавуй. Ме ччиччин кумакилди сагелан хIа ччуччус сус файдине. Хабди гьелбетта ччиччин кумакра фай, хIатти бицIиф эвлелмиш аркьай чиппис чарабур акьуна джаллабул хулан хизандин эессибур хьуне. Фиппур пучира дуьяйил аметтарис чарабур ве, кIина ушуттарин э джигьил Iуьмурарин ахир вереф.
Бабна дад кIи вегIдайи Фаизат гIуьфудпе классиъ ая руш ий. Хъара милас бицIи чуппара авуй хулаъ. Дарсариди вей, хаб вей учифас аттрукьа кар аркьай хIа хьуне ме. Са муз хIа классариди агъархьугуна гIулин вахттуни гъайи мебур махьтабиас хуппурар уцас. Махьтаб ккиркIунеа сара хурубарихъ хъучавес мебурис мугьлатар адавуй, дехIела хуру пешабурин эессибур хьундава. Хабди Фаизат ушуне Давудов Рамазанас шувас. Учин хизан арайил хьугунара лидегьен рехIетвелар мебурис адавуй, Фас пучин, мебур ке читин, гьер са задунин кьитвел ая ерчIцIурпе исар ий. ХIуькуматин кIил кIилил алдавуй. Гьертти учифас вере чарайилди ий кIил ухIаф. Гьеме вахттуни кар хьуне Фаизатас махьтабин уборщицавелди. Кардил ушухаб фиштти ичира вазаланф вазала вахттуниъ ай хулади Iу манат ачадиф самуз рехIет хьуне.
Учифас хабар гъушугуна ме ахъаркьа: «Хьес джаллабурис ягIа хIурин мукьуйиъ кIил ухIас мус хьучира лидегьен рехIет давуй. Амма загьмат дивутти нандиъ айчира учин кIил аттивасе. Гьемиштти чинра э, Чахъ че хизан хьухаб мал — къара ухIайра че кIил ухIуне. ГъиларигI Iуд бицIи шиникквара гIай уй, хIуькуматин кардилла алдей уй, мал — хIубра ухIай уй, гIаран — IуькIерин хуппурарин курара ппара акьуне. Гьалдин вахттари рехIетар ппара ая. Гъили кан гIуьрччанф андава, хъахъуна хьед гъареф андава, хьураккди ушуна гуни уджаф андава, алтухъ ппара малара хъандава, хуппурара сайи — Iуйи дала узай андава, IуькIер акьасра бегьем рехIет хьуная. ЯгIайин ягъас чин шиниккварис цIакIинара акьуная, альхIамдулиллагь кьит заманабура андава. ХIа инсанари агъаф суман пул фай базариди ушучин гIуран кIарчра кехIей гъушанас хьасе. Загьмат дивас кканеттис гьер са иши лекра ягIа пул э».
Уч алтухъ яшттин хIаф давайчира учин Iуьмурдин те вахттарихъай гьучикIучин гьалдин вахттари бегьемди мугьлатара иджвелара хьуная агъа ме.
«Амма махьтабиъ кар акьас те вахттари рехIет ий. Фас пучин тегуна шиникквар наши ий. Мебурин йиркIвар гIудул ий, хIаф бицIиф, нуьхIуьбат хIуьлмат ягIай уй. Чиппис йи насихIет фарцанди ий. ЯгIа ме курарихъас кар ппара читин хьуная», — хъара ахъакьуне Фаизат Исмаиловнайи.
ХьибцIурна якьу истти ме кар акьас пугуна зарафат дава. Хъара джандин сагъвелра кьуватра ирай учис ягIайин хабра ацIуна исари кар акьас.
Салихат Малагусейнова
