Джаллабурисра ягIа мегIелимвел лап джувабдар кар идеф. Амма дуьйил алдея гьеме кар фудай экьвас деве инсанара. Магьа 53-пе ис э Зарият Шерифовна(1972-пе исалас мич) шиниккварис дарсар киланди. Мидегьен гагьди лиханди аячира, мис учин пеша ппара кьабулде. Зарият Шерифовна суман мин хизан -Iели Гамидовичра-мегIелим и.
Шерифан Зарият хефе Типпигъарин хуриъ 1953-пе исан 2-пе майди, Хемидан Ieлира гьемисаъ – 1947-пе исан 22-пе апрельди мисаъ хефе.
Типпигъарин махьтабиъ муядпе класс ккиркIуна1968-пе иса ме Буйнакскдин педучилищайиди ушуни хурас. Тисаъ хуруб ккиркIугъилди Зарият Шерифовна Дулдугъарин хIурин бицIиттарис дарсар кияанас гьикуни. Гьемисаъди,учин хуруб ккиркIугуна,1971-пе иса физкультурайин дарсар киянас ЧIинарин ХIемидан Iэлира гьикуна уйи.
Зарият Шерифовнайиагъа: «Чин ппара иджи кьабул акьуни дулдугъарин шиниккварира, гебурин бабарира: батIарди алучIуна хурай, чиппик са багьанара кикIас адартагъилди

эркьвай. ГIерчIве хIур ичира час четинвелар алчархьас аркьай давуйи гебури. Фидегьен гисаъ иджи ичира, жуван хIуриди йиркIв дивайи, дехIела 1977-пе исан сентябрьдин вазалачин IудараТиппигъарин хIурин махьтабиди адини. Мисаъ зас хIа классариъ Iуьрус чIалан дарсар килан кар йини, (Дулдугъ кар аркьай ай,1975-пе иса зун МахIачкъалайиъ ДГУ-йин филологический факультетди хурас учIуна уйи).

Iэли — физкультурайин дарсар киланф и. Зас ппара кьабулди зе кар: хье агъуларин шинникквар Iуьрус писателарихъай таниш акьас: Пушкинахъай, Лермонтовахъй, Гогольдихъай, хъара амедеттарихъай. Шиникквара иджеттар и, дарсара хурайи, амма час, хIуриъас айчIуна, Ставропольский крайдиди вес алчархьуни. Мисаъ зун Минераловодский райондин Перевальный агъа поселокдин №10-пе махьтабиъ Iуьрус шиниккварис Iуьрус чIалан дарсар килан мегIелимвел йини, Iэли Гамидовичас -физкультурайин дарсар киланф. КIилиъастти зас гучIайи: фиштти э зун-дагъви дишагьли-Iуьрус шиниккварис Iуьрус чIалан дарсар киланф агъай. Амма четинвелар ппара гагьди хьундава: шиникквара, гебурин бабара гъавурдиъ архьуни зас зе кар кьабулди аяф, зафас верегъилди зун алучIаф. Инсанар иджеттар и, шиникквара алучIайи дарсарил: ацIуна къизил медаларна, арсуран медалар гъушуттар хьуни тисаъ. Переваловский махьтабин шиникквар хъай чин,мегIелимар,Ставропольский крайдин гьер шагьурариди: Пятигорскдиди,Железноводскдиди,Кисловодскдиди Лермонтовский мукьаридина сасра писателарин мукьариди экскурсибуриди вейи. Ппара идже вахтт и те.
Iелира учин кар йиркIв фай аркьай, физкультура дарсар килан мегелимарин методиствелди кьабул акьуни 1985-пе исалас 1993-пе исасттегьен, учира физкультурайин дарсар киланди чин ая(Перевальный) хIуриъ. «Гин командабури садпе ваI удпе мукьар фарцанди соревнованибуриъ, кьацIра бизардевеф суман лиханди Iели Гамидович учин кардил.Михъай кар аркьаттари Iелин хатир ухIас алучIайи, ге дугъревел ккане инсан идехIела. Са ппара грамотабурна поощренибур акьуни мис гьер джуьре спортивный соренованибуриъ батIар призовой мукьар фацубан. Михъас гьете исари Минводовский газитариъра ликIенди, Iели Гамидовичафас учи вардиш аркьа шиникквари агалкьунар вартт акьас хьуне агъай.
Фидегьен иджи ичира, че шиниккварис Дагъусттандиди адес кканди. 1993-пе иса адини чин мич, чахъай кар аркьаттари мева агъй алучIуна уйичира.МахIачкьалайин 31-пе махьтабиъра микес(Iеликес) методист по физкультуре и спорту хьуна уйи. Мисаъ чин кар аркьая махьтаб махьтаб шагьурдин 10 ке иджеттар э агъаттаригI хьуна уйи Iели Гамидович кIилил алди. Инспекторский проверкабур адегуна, тебури ми иджи кар аркьа, зурбадалди дугъревел ккане инсан э агъайи. Учи аркьа кар мус хьучира са бaгьанара кидикIагъилди аркьафи. Мис че махьтабин мегIелимар «правдоруб» агъафи»
Зарият Шерифовна ягIара Махачкъалайиъ (№31 махьтабиъ)2012-пе исалас мич учис бицIиттарис дарсар кияас кканде пуна, агьалра ме махьтабиъ кар аркьай аме. Мис иджи кар акьубан ацIун джевизар йина ая: грамотабурна дипломар, мис «Отличник народного образования республики Дагестан» агъа ттура йиная.
Iели Гамидович 2015-пе исан 27-пе июньдин вазала кичмиш хьуне са гагьди начагъ хьуна. Амма ме е уч кар аркьай уйи мегIелимарис, е ги дарсар кии шиниккварис хум вей дава : идже инсан и агъай. Мин ттур але спортивный соревнованибура кехIей аркьай аве.
Зарият Шерифовнайихъна Iели Гамидовичахъ 3 кIиркI хъая. Мебури чиппин бабар-дадарин ттур ахтт адайхьас артай адава: сад физкультурайин дарсар килан мегIелим э Шамхалдиъ, сасра офицер Росгвардии, хьибудпеф- музейдиъ кар аркьая. Джаллабурихъра ацIун джевизар хъая.
Аллагьди сагъIуьмур йирай джаллабурис. Дуьнья сакин хьурай, инсанар багайин ягъанихъанихъас дагучIай лиханас, чиппин валадарна хуттулар ухIас.
Тамам Рамазанова