Хье хIуькуматиъ гьер иса 5-пе октябрьди кIвал аркьа мегIелимарин хIаягъ пуна. Сифтта ме ягъ адихьуне 29-пе сентябрьди 1965-пе иса СССР-дин вахттари. Хабди ме кар тасттикь акьуне ЮНЕСКО-йи 1994-пе иса.

Ме ягъа кIвал аркьа гIилмин рекъуьъ загьмат аркьая мегIалимарна пешакурар. Гьер са пешайин бина э махьтаб. Гьелбетта гьер са кас гIилмин эесси вереф мегIелимдин загьматилдина гьунарлувелди э.

Сифтта дадар-бабари шиниккв рекъуьл аркьа махьтабиди, аманат аркьа садпе мегIелимдис. Мисаъ мегIелимди кьабул аркьа шиникквар, мисаъ дархъа гIилмин ракк ачмиш аркьа шиниккварис гIилмин рекъ. МегIелимдин вазифа джувабдарвелдин кар э. Миштти идегуна гьакIанди дава агъаф махьтабиъ хурая шиниккварис мегIелим Iудпе баб хIисаб э. Шиникквар махьтабариъ хура гагьди мегIелимди кIили гъа ме аманатин кар. Изображение Сад мишттин йиркIв фай кар аркьая бицIи классарин мегIелим э Адамова Сейранат Абдулгалимовна. Сейранат Адамова хуне Буршагъарин хIуриъ хIа хизандиъ. Дад мин АбдулхIалим хIа къулугъарил хьуф дава амма 41 истти загьмат дивуне хIуппарихъ вей. Хулаъра мебури ухIай уй мал-къара шиниккварира чиппифас верегъилди гъил учихьай уй хулан курарис. Баб Айсарата кар акьуне махьтабиъ техничкавелди. Хулаъ учихъ хъая шиберис гъилин пешайин кар ягIар хьас арайил аркьай хьуне хьеяр. Гьелбетта ме кар рехIетинф дава ахъаджихIуб ппара кканве. ХIезур туникес мебури аркьай хьуне кьвадилкьванар. Те вахттари Айсарат лап ттур ая батIар накьишар алихьа  кьвадилкьванарин устта ий. Исан арайиъ мебури 5-6 кьвадилкьван хулас акьуна  хъара кьабул аркьайхьуне сасрабурин заказар. ЯгIар акьуне ме учин шиберис хурас гвегIенар, аликIа ибгIа шейэр. Шибер хIа хьухаб мебурис ун архъай хьуне Табасаранский райондиъ кьвадилкьванар аркьа мукьуийди. Мисаъ хъара вартт хьуне мебурин дараджа. Гьемиштти чиппин мадарар аркьай Айсаратана АбдулхIалима ухIуна арайил акьуне чиппин шибер шиникквар. Хизанра учингъилди махьтаб, гIилмин идара хIисаб э. Мисаъ дадана баба э   шиникквар иджвелин рекъуьъ ихьаф, тIул-тIебегIет вереф,  тарбия ирцIанф, гьер са кардин гъавурдиъ ихьаф. Хизандин кIил, эесси дад, хал-хулан гьава ухIаф баб э. КIилди мебур ай уйи цIаса шиниккв. Сейранат шиберикес ке бицIиф э. Махьтабарин хурубар ккиркIуне 1991-пе иса. БицIи классариъ амий иджи хурай уй Сейраната. ЙицIудпе класс ккиркIуне идже кьиматарилди. Мин мурад ий учIас хурас духттурвелдин курсариъ. Учин ягIарвелилди экзаменара йина Дербентиъ медучилищейиъ учIуне ме. Амма мункинвел хьундава хурас Сейранатас. Те вахттари гьалдин заманайиъ суман ачухъвелар адавуй. ХIурариъ яшамиш вея инсанарис са чукь читинвелар уйи  шагьурариъ эркьва-гъайша  мукьар джикIенас. Дадар-бабаринра йиркIура кьабул акьундав ме садтти гьикас шагьурдиди. Дадана-бабан чIал валадарис хIа э хIуькуматин къанунилас. Миштти идегуна дадана-бабан хIуьлмат ухIуна Сейраната сара гудж акьундава ме кардис. Амма учин йиркIураъ ая кьасттунихъди муш кеттархьундава. Са исалас Сейранатахъ хьуне учин хизан шиникквар. Шиникквар арайил хьуна учин хиял бегьем акьас хизандин разивелилди ме учIуне хурас Дербентиъ педагогический колледжиъ мегIелимвелдин курсариъ 2002-пе иса. 2004-пе иса ме кардик хьуне Буршагъарин хIурин махьтабиъ бицIи шиниккварин мегIелимвелди. 2005-пе иса ккиркIуне хурубар, гъилиъ хьуне диплом. ЯгIайин ягъас 22 исан стаж хъая Сейранатахъ. Хизан Сейранатан Малакурбанов Курбан Сеферовича хурубар ккиркIуне ДГУ-йиъ биологин  курсар. Кар аркьая Буршагъарин КДЦ-йин директорвелди.   Сейранатана Курбана чиппин шиникквар шибер хурубарин эессибур акьуне. ЯгIайин ягъас михъ хъая якьу шиниккв Iу кIиркна Iу руш. Мебурихъра хъая чиппин хизанарна шиникквар. Сейранатан чIаларилди, инсандихъ учин Iуьмурдиъ хъай кканде кьастт йиркIураъ ая хиял бегьем хьас.  ГIилми инсадис Iуьмурдин илдеш хIисаб э рекъ ачухъ аркьаф.  МегIелимвел  аманатин кар сабур хъай кIили файшуна кканвереф. Джалла мегIелимарис сагъвелар, сабур йирай кьиматин кьадар адава кар кIили гъас.    Наиба Гасукаева