Iуьрус театрдин верш ис къаршиламиш акьубан планихъас гъургъуне Дагъусттандин культурайин министр Зарема Бутаевана, ме театрдин директор Тимур Магомедов. Ме кардихъас информагентствойис хабар йине РДйин Минкультурайин пресс-службайи. Ме мегIракайил иштарак акьуне министрдин заместитель Мурад Гаджиева, искусствойинра творчествойин проектарин хIаф Марьям Гаджиевайи, хIуькуматин плановоэкономический программабурин хIаф Джамиля Нурахмедовайира. Юбилейдин мегIракайин къайдабуриъ агвар акьасе цIае тамашабур, акьасе театральный фестивалар, хъара джуре курара. Ме кардин сифтта кIил хьасе Российин шагьурариди тамашабур фай ушуб. Артистар весе Владикавказ, Москва, Калининград, Ярославль, Тюмень, Красноярск шагьурариди. М. Горькийдин ттуранихъ хъая театр хе республикайиъ садпуф и. Ме дахъуне 1924-пу исан октябрьдин вазала Дагъусттандин Наркомпросдин икьрарилди. Ме кар ппара кумак хьуне джалла миллатарин культура гьава акьас. Театральный садпу сезон гIуьфу вазди давам хьуне. Ме вазарин арайиъ дагъусттанагьлибурис агвар акьуне А. Грибоедован «Горе от ума», К. Гоццин «Принцесса Турандот», Н. Евреинован «Мандат». Ахиран вахттари Iуьрусарин драмтеатрдин кар авадан хьуб бадала ппара майил акьуне А. Щекочихин, Э. Асланов, И. Казиев агъа режиссерари. Ке читин 90-пу исари хъучучIуне мисаъ С. Тулпарован творчествойин рекъ. Фидегьен четин хьучира, театрди учин кар зурбадалди давам акьуне. Ме театр хIа иштаракчи э гьер джурейин фестиваларин. Театрдин хIаф С. Тулпарован зурбавелди мебури иштарак даркьа мукь адава. Ме мегIракабури дагъусттанагьлибурин садвелна дусттвел хъара цIуппе аркьа.
Салихат Малагусейнова