Ху чIал гьер са миллатин, халкьдин ке цIуппе мерI э!

Фас пучин чIал дарин хьудегьен миллатин даваилура ирхе хьасе. Миллатис учис гъам кедавахаб учин абадайихъас, сайифасра мин гъам акьас дивас хьасттава. 

Миллати пугунара, хьин фикир акьуна кканде хье гьер са кьадамилас асуллу идеф халкьдин гьававелра. ХIаттарин мисала аяф э садтти дараъ са кIура дахьурай агъаф, ме агъа чIал э хьин джалла сад дахьудегьен гагьди са кара дузди кIили гъас хьасттава пуна. ЯгIа ме кардихъас сайисра алтухъ фикир кендава. Гьелбетта ме кар кьацIра дуз дава. Ул ачатучин хье шиникварис ягIай андава хье дадар - бабарин чIал. Авала Iари шагьурариъ аяттар ичин Iуьрус чIалалди гъургъай уйф, ягIайин ягъанис хIуьрариъра тек - туьк дала унихьай андава шиниккварин сивиас ху чIалан джил. Ке бицIи шиниккваракехIей гъургъай аяф Iуьрус чIалалди э. Миштти илгучин, хье чIал кьацIраминдай хум весе шиниккварис са Iу исарилас. Грамматика ягIар аркьайдала, бицIи классариъ шиникварис гъургъас ягIар аркьай кканде хье чIалалди. Нандиъ айчира, гьерттин йиркIураъ ай кканде учин чIал хум гьадатас. ЧIал гулучин халкьра гуланасе агъа. Гьер са инсанди учи фикир акьуна кканде, учин халкь дагуланас. Шагьурариъди айчIуна ушунаттарин шиникквар нагагьра гъургъай андава агъул чIалалди. Хье милат ккеттдархьас, кIвалас гьатуна ккандава ху чIал. Шаб хьин ухIас хье миллат. 

РРГ "Вести Агула" ГБУ РД "Этномедиахолдинг "Дагестан"