Хьуне агъа хьундава агъа са касиб шиниккв. Касибвел фиттилди э ге кIиркIан пучин — дадар бабар хъундавелди э. Садти яшамиш вей хьуная ме хIа хулаъ. Ягъарикес са ягъа экьуна ме учин эл ккертай ттаккрайиас гьел атай, агуная мис кIуранил хьибу луф. Фатуная ми гьел сад керхьуная джилиди, Iуд алттушуная. Дахи дахи гьучушуна кантI аттивуна руккас кканхьуная мис луф, са арайилас инсан суман гъургъуная михъай луф.
— Гъузен, вун зун руккучин вас са иджвелра хьасттава, эгера джан кими атучин фиттинчира иджвел хьасе.
Iегвал хьуная ме кIиркIас луф Iелефра ирцIанди ахъаджихIуна сагъ акьуная ме. Са ягъа ягъуйи ахуни гIачушуная ме кIиркI, луфуракес ттуттуна учи уч хьуная батIар руш. ХIеракат акьуна хъучучIуная ме курар акьас, акуруна халра мертт акьуна, джалла шейэра чаб чиппин мукьариъ атуная. КетIуная шиниккв ахуникес аргва мис учин багулив экьуна са батIар руш, тич мич хъуттурфуна аргва учин халра батIарди мертти аяф. Тамаш хьуная мис гьина э гьан ме ус батIар акьуна гьативунаф пуна. Луфурахъас мис кIваласра ушуная.
Ппай ме батIар руша агъа мис: — Зун гьете вун сагъ акьу луф э. Гьал зас вас хIуьлмат акьас кканде зун йи чIалан джуваби ай. Нагагь вун рази ичин зун ве хизанди экьвасе. Шад хьуная ме касиб шиникквдис. Сад сайил бахилди яшамиш вей хьуная мебур. Кьвадилкьванар руха пешабура кеяф хьуная ме руш. Садпе ягъа димари рухуная ми кьвадилкьван, завкуругъилди алгъихьуна кьвадилкьванра ушуная ме шиниккв базариди, масса йиная батIар кьимат акьуна пачагьдин вазирдис. Хаб Iуьши садсара рухуная ми, кьабахъ ягъа хаб ушуная ме шиниккв шадтти базариди алгъихьуна кьвадилкьванра. Гьеге арайи пачагь экьуна ахьуная тIагарихъ. Агуная гис шиниккв алгъихьуна кьвадилкьванра вей, унахъуная учигьди, хъара ппара пул йина гъушуная мивас кьвадилкьван.
Вазирдис агуная мин кьвадилкьван, паччагьдис пуная:- Зун накь гъушу кьвадилкьванра гьемишттинф и.
Паччагьди хабар гъушуная ме шиникквдивас:
— Нандиасе вун гьеме кьвадилкьванар гъаяф?
— Ме рухаф зе хизанди э, — пуная ми Шиниккв ушуная хулади, паччагьра мин вазира хъучучIуная ме кар ахттармиш акьас. Кьабахъ ягъа ушуная мебур ме касиб шиниквдин хулахъди. ГIанаъ ахьуная мин батIар хьир, агуная мебурис ме. Унахъуная мебури ме шиникквдис хъучучIуная хабар гъуршанди нандиас хьунаф э вас са касиб шиникквдис гьемидегьен батIар хьир агъай. Ме шиникквдира учин майданвелди ахъакьуная мебурис нандиас хьуфчин. Хьирас иджи кьабул хьуна адава ми ахъакьухIела. Ме кар ягIархьуф паччагьдис кканхьуная ме хьир учис гъас, кканхьуная мис ме шиниккв гьер джурейин буюрмишар аркьай агьихьас. Амма ме шиникквди паччагьди пудегьенттар аркьай ахьуная. Ахирахъди паччагьдин вазирди унахъуна мис пуная: — Див джикIина, гъушуна, фаша! Пушмалди адиная ме хулади ахъакьуная учин хьирас. Ми дахидахи рухуная бицIи суман берхел, йиная шувалди ягълукъра пуная: — Пушмал мева, кIилди идже хьасе. Алекьв гьеме берхелил, гьеми вун гъасе герек иде мукьуйиди. Ме гъузугуна, ягълукъ тnуттуна хабар гъушан фигъа чIал э пуна «ушуна гъушен агъаф». Экьуна берхелил ушуная ме касиб шиниккв. Алттвей хьуная мебур дагьарарилас, нецIварилас, рухарилас ачархьуная са магъарайиди. Гъузуная мин берхел. Тич мич хъуттурфуная ме шиниккв агуная хIа дворец, гьава кIукIар але цалар, батIар хулар. Гьучадиная мигьди гIерчIве инсанар ачафайшуная. КIвал хьуная мис учив фае ягълукъихъас, кканхьуная гъайхьас гьеге арайи алчишиная са Iуьсе хьир: — Нандиас хьунафе вас ме ягълукъ, пуная мис. — Гьеле зас зе хьира йинафе, — пуная ме шиникквди. — Гьалра дакIина амев те! — пуная ме хьира, шад хьуна кьакьаъ укъуная ме шиникквдин. — Вас ягIай хьурай, ве хьир зе руш э — пуная ме хьира. Шад хьуная ме касиб, ахъакьуная кIилди лап гьете луфарихъас мич. Гьеге арайи мигьди гьучадиная Iу руш. Гебур хьуная те алттушу луфар. Экьуная ме шиниккв мебурихъай, ахъакьуная мебурис учин дарди хIел. Хубджи фикирар акьуная багунттари, фиштти кумак аркьагьан пуна мис.
Са арайилас адиная са гIуб, пуная мис: — Шаб захъай вас кIилди ягIархьасе. Алийина учин гIунил файшуная ме шиниккв. Са хьибу ягъалас мебур аттархьуная са батIар шагьурдин хулагьди. Гьеге хулан удигь ае гIанаъ акьуная ме гIубура са уркI, учIуная шиникквра хъай уркIаъ. Са арайилас бадил хьуная мич ери гуджлу идеми. Ке бицIитти аттивуна джин акьуная Iеса пуная гис: — Див гъушан! Iесайи гьукк акьуна агьийиная батIар Iелеттар. Магьа вас герекди аф пуная ме шиникквдис джинди гIубала. Ме гуджлу идемар экьуна, IуьтIуна, ухуна джин акьуна Iесара ушуная. ГIуб агъучIуна, джикIина Iесара учIуная уркIади. Iуьшахъди хаб адиная ме идемар. Кканхьуная мебурис IуьтIанас, руцуная Iесайихъас, джикIина адава. — Гьал фикьасе. агъай вавшавар акьуная мебури, Iесайилди и хье гуджлувелра агъай. — Гьал хьин айчIуна кканде, — пуная гIубу. АгъучIуная мебур. сад миндавай кIес акьуная ме гуджлу идемар. Ме кардикес хабар хьуна джалла мисаъ дуламиш вея джемеIетис, шад хьуная. Ме гуджлу идемари шагьурдиъ ая инсанар ппара бизар аркьай ахьуная. Мебур чиппилас алттархьеф мебур шад хьуна хIаягъ акьуная. Ме шагьурдин паччагьди гьучихьуная ме шиникквдис учин девлеттар, амма ми фера гъушуна адава. Гъушуна учин Iесара, алекьуна гIубул хаб адиная учин хьиран багунттарилди. Хабди мич мин хьира адиная, джалла шадтти ахьуная мебур. Хабди ме касиб шиниккв учин хьира хъай алекьуна берхелил ушуная чиппин хулади. Ушуная ме паччагьдилди йиная тис Iесара, ти йиная мис ацIуна джавизар. Сара мис чIал агъаф хьуна адава мисаъ. Хьира шуйра Iудара хъай бахттлу хьуне мебурин Iуьмур.
Батитай Габибулаева
