Дагъусттандиъ 2027-пе исас фикирдиъ ая арайил акьас чIирхIар арайил аркьа джигагьар. 

Ме кардин суаларихъас, региондин муниципалитетарин къирагъ-буджагъариъ чIирхIар гьаттивубан суаларихъасра гъургъуне Премьер-министр Рамазан Магомедов кьанди файшу совещанил. 

Ме совещанигI ишттарак акьу хIагьулар гъургъуне Дагъусттандиъ чIирхIар гьаттивубан кар сад суман арайил хьас духIуба акьуна ккане ме кардин системайихъас. Магомед Рамазанова кIвал акьуне ме кардин суал рехIетинф суман аргваайчира кIилди бытовой сасра чIирхIара гьаттивуна кар бегьем акьуна ккане вахттунихъасра. Ме кар арайил хьубан механизм читинф э. Эгена са кардехIера гIатучин хабар ве инсанарис. Амма ме кар бегьем хьуб бадала арайил акьубан четинвеларихъас инсанарис хабар вейдава. Миштти идегуна чIирхIар гьаттивубан кар завал акьубалас арайил акьубахъди рукьуна сад суман акьуна кканде - пуне Магомед Рамазанова. 

Гьеме иса хье республикайиъ алтухъ акьуная чIирхIар архъа контейнерарин площадкабур агъзурарихъди рукьуна. Мебурикес 489 арайил алдея. Ме кардин кьайдабур яваш дахьас муниципалитетарин хIаттарин алгъузуб ахьуна кканде. ЧIирхIар гьаттивубан суаларихъас, ме кардин рекъуьъ инфраструктура гъадивубахъас гъургъуне РД-йин экологин министр Ратмир Расулов. Гьеме кар бегьем акьубахъди барамбарди арайил ве сасра суалара, вахттунис арайил хьуна ккане курарин. 

ЯгIайин ягъас арайил акьуна ккане суал э региондиъ оператор гIаттивубан суал. Республикайиъ чIирхIар гьаттивубан инфраструктура гъадивубахъас, цIае гIемалилди мебур гьативубахъас майил акьуна гъургъуне РД-йин тIабиIетин нуьгIматаринна экологин замминистр Саният Билалова.

 Саният Билаловайи кIвал акьуне республикайиъ ягIайин ягъас аркьая хьибуд чIирхIар арайил аркьа комплексарихъас. 2024-пе иса Кумторкалинский райондиъ акьуна ккиркIуная 300 агъзур тонн кьуватин ТКО-йин полигон. Гьеме исан ахирас бегьем акьас фикирдиъ ая Карабудахкентский райондиъ аркьая полигон. Ме комплексарин ахттигьарарин кIеджар арайил хьугъилди Iудар объектари башламиш акьасе кар, 2027-пе исас. Гьемиштти 2025-пе иса Дербентский райондиъ акьуная са исан арайиъ 200 тонндегьен чIирхIар хIел аркьа коплекс. Хъара гьемисаъ акьуна ккиркIвая исан арайиъ 120 агъзур тонндегьен ТКО хIел аркьа полигон. Хасавюртовский райондиъ хIезур аркьая полигон МСК 2027-пе исан Iудпе кварталдис - пуне Саният Билаловайи. Магомед Рамазанова учин нубати кIвал акьуне вахттуни чIирхIар гьативубахъасна контейнерар алихьа мукьар дезинфекци акьубахъас. Хъара ме исан ахирас республикайиъ 500-дегьен площадкабур алтухъ акьубахъасра.

Наибет Гасукаева