Ахьуная са гьемишан иджи, йиркIв фай кар аркьа хуларин устта(Прораб). КIилин Iуьмур хулар аркьай ушуная мин. Iуьссе хьуна, пенсиди айчIва вахтт хъучадиная мин. Адина чиппин идарайиди, йиная ми гIерза: -Гьал зас хулаъ экьвас кканди ая, къарихъай хуттулар ухIас,-пуная хIаттис. -Хьурай, гьал сара вун са ахиран хал сара акье, хуппай чин вун, са идже премира йина, рекъуьл акьасе,- пуная мис хIатти. Ме устта рази хьуная. Мегелай ми акьуна кканди ахьуная чукь хизанар хъаяттарис са бицIи суман хал. ХъучучIуне мебур (идарайин къулугъчибур) хулан тагьарарин ишкил атай, ге хулас лазим вере задар гъушубахъас, найиштти идже хьасегьан агъай фикирар аркьай. Усттайис тегIди кехьуная. Мис хияларикес уч пенсиъ ай аргвай хьуная учин хуттулара, къарира хъай тич-мич ккидаркай, кардихъас са фикира даркьай экьуна. ДехIела, ме хал аркьагуна, дахи джикIина, хъучагъас рехIет вере уджузин задар гъуршанди, алтухъ хулан батIарвелдихъас, ге цIуьппе хьубахъас фикир даркьай, техIкум ахъикаттисуман аркьай хьуная учил але кар. «Ме зе ахирангелай аркьая хал э. Хуппай зун пенсиди верефе», — агъай йикIвураъ ай. КкиркIуная хал акьуна. Мис ягIай хьуная учи мегелай акьуна ая хал сасрабур суман иджи дакьунаф. Амма гьегиштти ичира: » фера акьасттава, зун сара мисаъ ахьасттава», — пуная ми учикестти. Унахъуна, агвар акьуная усттайи чиппин хIаттис ме уч кIилил алдий акьуна ккиркIву хал. ХIаф гьер багварихъас хъуттурфуная хулахъ. -Вас ягIайчин, гьеме хал веф э! Ма вас гилегвара, гьал сакинди экьве пенсиъ вун акьу цIее хулаъ. Документар джалла хIезурди ая. Ме хье фирмайин ттуранихъас вун ппара гагьди иджи кар акьубан преми э чин вас ирцIанди аяф,-пуне хIатти. Мин йиркIураас фи хиялар адайшунчин те гафар унихьугуна, ягIаф Iари са учис э! ЦIа суман ире хьуна гъузуна ахьуная ме, учис гиштти пе вегIдайи. Михъай кар аркьай авуйттари чIепIер атагунара, цIае хал нубарак хьурай агъай, гьегиштти ахьуная ме. Гьал учи йиркIв фадай акьу хулан чIирхIевелар джалла учинттар идефра гъавурдиъ ай, ире вей уй ме. Амма сасрабурин хиял и мис неч хьунафе пуна, учис фирмайи мидегьен хIа савкьат акьу хIела. Гьал гьеме учин Iуьмурдикес учи ке чIирхIи акьу хулан эесси хьуна, учис яшамиш хьас алчар хьуне мисаъ.
Тарджума акьуф: Тамам Рамазанова э
