Хъучавея ерчIудпе май. ГьакIанди кIвал аркьая ягъ дава ме хье хIуькуматиъ. Ме хье хIададарира хIабабари зурбадалди дегIвиъ гъалибвел гъушу ягъ э.
Фишттин гIезабар, зулумвелар алайшуна гъушуная гъалибвел ичин ме хьес сайисра гьуркIун ягIай адава. Хьес ягIа дегIви агу инсанарикес ахъакьуттарикес, хуру китабарикес, телевизордиас агвар аркьа кинубуриас.
Амма батIарди фачатучин мебури ахъаркьаттар, алайшуная ягъарIуьшар, гашар, мекIер, зулумвелар, улариъ негъв удукуна, деIешуна экьвас вейдава. Фидегьен инсанар кIиттар хьуная, гулуттар, дадар-бабар кIина ятумар хье шиникквар, сайиштти ягъниш керхьуна илгуттар. Сад-Iудра адина ахьуна адава дегIвиас сагъди джандик са ишанра кидавай. ЙиркIуралас гьатас вере курар дава мебур. ДехIела гьер иса хье хIуькуматиъ ерчIудпе май адихьуная хIаягъ э пуна. Ме иса ме дегIви ккиркIугунахъас хаб 80 ис бегьем вея.
Ме хIаягъахъди ппара хIезурвелар аркьа хье халкьди. КIилил гъузуна хIаттари ягъар ккимий завал аркьа хIекимар, ахт тармиш аркьа мебурин хIезурвел хIаягъахъди, хъара буюрмиш аркьа чиппис иджи аргва, акьуна ккане курар.
Ме хIаягъ бадалди хье хIуькуматиъ аркьа гьер джурейин акцибур: «Знамя Победы», «Сад памяти», «Диктант Победы», «Окна Победы» хъара «Георгиевская ленточка» агъаттар.
Ппара ме ягъахъди хIезурвелар аркьа махьтабариъра.
Дарсариди унархъа дегIвиас аде ветеранарис, ера гебурин валадарис. ТIалаб аркьа гебурикес ахъакьас дегIвин вахттарихъас, шиниккварира тIегIем аркьагъилди, фидегьен четинди фачархьуная гъалибвел ичин хьес ме. Исар алттвередегьен ветеранарин санра чIукь вея. ДегIвин вахттари джандик керхьу йирхIунари, хабди джандивасра хьуная гебур.
ЯгIайин ягъас акьу хIисабарилди хье Дагъусттандиъ амеф 10 ветеран э. ДехIела хье Дагъусттандин хIаттин Сергей Меликован ппара тIалаб ая батIарди йиркIв фай хъучаверегъилди ме хIаягъ акьубахъ, гьер са ветеранихъди вахттуниай ахъарукьас аркьагъилли чиппис хIезур акьу савкьатара.
Хье хIададарира хIабабари чиппин джандилас гъил гъушуне, хьес идже Iуьмур йис пуна. Гебур йиркIуралас гьадатуб — хье гьер са инсандин вазифа э.
Батитай Габибулаева
