Дагъусттандиъ магьа Iу ис э турпоездкабурин сан вартт гъайшина джуре усарихъ хъуттурфуна. Ме кардихъас хабар акьуне хье хIуькуматин Минэкономразвитин хIатти Максим Решетникова нубат але совещанил туризм авадан хьебан суаларихъас гъургъаусал. Ми чIаларилди гьеме Iу исан арайиъ 40 процентдегьен вартт хьуная Северный Кавказдиъ турпоездкабур.

«Ме совещанин кьаст хьуне туризмдин суалар арайил акьуб, хъара регионари ишттарак аркьагъилди гьер джурейин туристический программабуригI. ЯгIайин ягъас Северный Кавказдис ппара мункинвел ая ишттарак акьас гьер джуре программабуригI инфраструктурара арайил аркьагъилди, фас пучин мисаъ ме ппара герекди ая. Са нацпроектин программайилди СКФОйиди хьибу исас фартая 1,7 миллиард пул субсидибур», — пуне Максим Решетникова.

Ме субсидибурин манатар субъектарифас ачатас хьасе чиппин хIекьданди арайил акьуна ккане усариди. Мебур э: — Туристар вере рекъерил инфраструктура арайил акьуб бадала — кемпинг стоянкабур дахъубасра, хъара кемпинг палаткабур гъушуб бадала — хIуьлин къирегъар батIар акьубарис — хъара фестивалар акьуб бадалдира. Минэкономразвитин хIатти йиркIурал акьуне ме региондиъ ке ппара инвестиционный проектар цIае номерной фонд акьас.

ГIерзабур кьабул акьун ккиркIубахъди конкурсдин льготный кредитованин программайилди гIуьфу региондикес ахъадиная 24 гIерза 3,5 агъзур номердис. Гьалдис Северный Кавказдиъ арайил аркьая 20 проект лап хIа гостиницабурин 4,6 агъзур номердин. Гъадивунара ая модульный гостиницабур 1,7 агъзур номердин.

Батитай Габибулаева