Хье хIуькуматиъ ахиран вахттари адихьая ппара гьер джурайин программабур, проектар гьер идарабурихъди. Мишттин мегIракабур хье хIуькуматиъ исалас иса алтухъ аркьа, фас пучин садпеф инсанарин Iуьмурдин рекъ иджвелихъди хьас пуна э, хъара варха мукьариъ ая хIуьрар районар ккеттдархьас. ХIурар кеттархьучин миллатар, инсанарин гIедатар гуланасе. Хьес ягIа хIурариъ ая инсанар джурейи алучIа ухIас чиппин гIедатар, гIедатилди чиппин дуламишвелар акьас хабди вере несиларисра гIедатин хьил амилгвас. Агьалдин заманайи инсанарис дуламишвел акьас хIуькуматтин багухъас, мункинвелар майл ппара хьуная. ЦIае идарарабур ачмиш аркьая, шиниккварис цIеери ис хьасттегьен пулун кумак аркьая, хъара кумак аркьая мал къара ухIас кканеттарис. Мебурис хIуькумати ирцIанде кумакин пул хаб дайирцIангъилди. Миштти иджвелар хIуькуматин багухъас айчира амма ая джегьил хизанар хIурариъ дуламишвелар акьас дакканттар. Гьелбетта джалла сад верефттава, ая кьацIра шагьурдин Iуьмур, яшамиш хьас дакканттар. Сулейманов Заур Джамаллудинович сад гьемишттин учин хизандихъай дуламишвелар аркьай хIуриъ Iуьмур гьикаф. Заур Джаммалудинович хуне Буршагъарин хIуриъ бицIи хизандигI. Дад Зауран Сулейманов Джамалудин э, гьамера учин джегьилди агунахъасхаб яш хьасттегьен ягъ Iуьш дагъай, Iурдин аяз гIулин угъал дагъай хIуппар малар ухIай яшамаиш хьуфе хIуриъ. БицIи хIурариъ хIуькуматин курар мусс хьучира кьит ий. Миштти идегуна хизан лекул гъадивуб бадалди ппара загьмат дивуна кканве. Баб Зауран Сулейманова Маржанат хIуькуматин кардил алдавуй учин хизандихъай къвал къвалуъ ай гъадивуне чиппин шиникквар. ЯгIайин ягъа учин дадан кар давам аркьая Заур Джаммалудинова. 2004-пе иса махьтабин хурубар ккиркIуфна сад учин хурубарин йина экзаменара Заур ушуне хIуьппарин гIан акьас. Те вахттари махьтабариъ ЕГЭбур адавуй йина экзаменара ккиркIвайи хурубар. Гьемихъай гIешкъунилди ушуне кIилди классин шиникквара. Хабди ме ушуне хьибу истти джемеIтин ккеларихъ. Фидегьен хьес хIуриъ канн аркьайчира, амма са сагелан хьунара ул хъархьа шагьурарихъра , гьемиштти Заура учис бицIи хурубар акьас ушуне Каспийск шагьурдиди, хабди Вологдайиъди са Iу хьибу истти машинин правабур акьасра. Хабди давам акьуне ми учин кар, гъушуна ккийина учис малар хIуппар экьуне хIуриъ учин дуламишвелар аркьай. Заур Джамалудиновичан чIаларилди: — «Дадан пеша давам акьубан пушмалвел хьу ягъ зе адава. Зун шукур аркьа зас гьемишттин ризкь кьисмат акьубан ягIайин ягъас, зе дадна баб багулифай зас лиханас сагъвел йибан. Хъара хIа Iуьмурдин савкьат э гьертис хизан шиникквар кьисмат акьуб, мебур лекул акьас зас ягIайин ягъа амур хьуб. Гьер инсандин Iуьмурди алчархьа курар э четинвелар гашар, азиятар, гIезабар, гьер четинвелдихъ ачухъвелара хъаве». Гьеме иса Заур Джамалудиновас мункинвел хьуне гирами мукьариди вес учил але гIуьфудпе фарз бегьем акьас.
Наибет Гасукаева
