Ттиан Рамазандин ваз алчархьуне хьидин садпе вазалал. Мусульман хиджрайина(календарь) Iуьрусарин григорианский календарьдин ппара джуревелар ая. Ме иса марттин вазалан садпе ягъа кIилди дуньяйиъ ая мусульман халкьдин инсанари хъучучIуне ухIас сивар. Рамазандин ваз ке багьа гирами ваз э дин исламдин халкьарис.
Ме вазалан арайиъ мебури бегьем аркьа гьертти учил але фарзарин шартIар. УхIа сивар, гьертти ирцIанде учил але закат(налог), аркьа садакьубур. АлучIа хьудегьен алтухъ акьас иджвелин курар. Ме вазала инсанари ппара сивигI аркьа Ифтар агъа чIал. Ифтар Iерабарин чIал э. Хьин агъа сив гьартас. Ахиран вахттари мусульман халкьадин инсанарин сив гьататтар акьуб рехIимлу гIедат хьуная. Мишттин маджлисар арайил акьуб иджвелин кар э садвелдис маслихIетис алчушуб-алттушубдис. Гьалдин заманайи суман ачухъвелар мункинвелар адайчира Ифтарар авалдин вахттарира аркьаф и. Сив гьататтар аркьаф и гьертти чиппин хулаъ хизандин арайиъ унахъуна багукIиларис. Агьал суман булди Iеле шейъ адайчира гьелбетта ямаг аркьайи гьертти учин кьвачIайихъ къуттурфуна агърукьагъилди. Рамазандин ваз хъучаверегунас гьаттивуна хIезур акьуна артаф и ччам бакъукъ акьас, рукъу якк, хIалатут. Мишттин сурсатари кьуват ирцIанди джандис.
ЯгIайин ягъас инсанарис мункинвелар ачухъвелар хьуная кIили гъас гьер са мегIрака мадж лис. Ифттарарин маджлисар аркьайхьуная кIилди дуньяйиъ ая мусулманари.
Дагъусттанди 2022-пе исахъас хаб арайил акьуне джемеIетин арайиъ ифтарин маджлисар. Гьемиштти гьер иса Рамазандин вазала ачмиш аркьа садвелдин маджлисар гьер миллатарин халкьари хIа шагьурариъ, районариъ, хIурариъ.
Ме иса Рамазандин вазалан сифтта ягъари Агъул халкьдин садпе ифтар хьуне Москва шагьурдиъ. Ке удигьай ме кар гьучихьуне Москвайиъ ая Муфтиятин вакилари. Арайил акьуне ме маджлис Агъул халкьдин общинайин представительди Малик Мустафаева. Гьеме мегIракайигI ишттарак акьуне Агъул райондин имамарин Председательди Юсуф Магомедова. Завал хьуне мисал Москва шагьурдиъ дуламиш вея гьер хIурарин Агъулар. Хабди Агъул джемеIетин ифтар хьуне Махачкала шагьурдиъ.
Кьанди 16- пе мартти Агъул райондин ЦТКНРдин идарайиъ хьуне ифтарин маджлис. Ме мегIрака кIили гъадивуне Агъул райондин хIатти Закир Гусейновича. Мисал завал хьуне гьер хIурарин имамар, инсанар. Ифтарин маджлисихъди адине РДйин Народный собранин Агъуларин депутат Гаджиомаров Магомедали Наврузовича. Хъара гьемишттин садвелдин ифтарин маджлисар хьуне Буршагьарин ,Арсугъарин, ЯрIугIарин хIурариъ.
Гьемиштти давам акьасе аме хIурариъра.
21-пе мартти хьасе Гъудгъуларин хIурин ифтар. КIилди гьеме маджлисар арайил аркьаяф хье Дагъусттандиъ Муфтиятин ахтигьарилди э.
Кам дахьурай мишттин садвелдин маджлисар хье миллатарин халкьарин арайиас.
Наибет Гасукаева
