2025 иса Дагъусттандин ятум шиниккварис хулар гъушанас йисе 840 млн манат Дагъусттандин премьер-министрди Абдулмуслим Абдулмуслимова файшуне мегIрака. Мисал мебур гъургъуне дадар-бабар кIилил алдава ятум шиниккварис хулар йибан суаларихъас. Абдулмуслим Абдулмуслимова кIвал акьуне, ятум шиниккварис аркьа майил, джалла суаларилас ке тегIди хIел акьуна ккане суал э гьаяф хIаттарин удигь. Гьер иса федеральный бюджетиасра региондин бюджетиас ятум шиниккварис хулар гъушанас фарта са фулан кьадар пул.
«2025 иса ме курарис федеральный бюджетиас гьикасе 190 млн манат. Мебур кедавай 653,8 млн манат гьикасе республиканский бюджетиас», — пуне республикайин премьер-министрди.
Ме арайилди аттивуная пулун кьайдайилди са пай гьикасе хуларин сертификатар гъушанас, сасра пай -пай акьасе районаригIди ме пулун хабди гъушанас джигагьар. Миштти идегуна, че фикирарлди хулар йис хьасе 300 инсандис. 2024 исара ме курарис кIилди хIисаб акьугуна гьикуна уйи 800 млн манат, мебура пай акьуни Iу багухъди.
«Садпе багв — ме фатуная пулар гьер райондин администрацибурихъди рукьуб, мебури хабди бехIсунин мегIракайилди гъушуне 2024 иса 108 джигагь хабди йине мебур ятумарис. Iудпе багв — йине хулар гъуршан сертификатар. Миштти акьасе ме исара»,-пуне Дагъусттандин строительствойинра, архитектурайинра ЖКХйин замминистрди Салам Гасайниева.
Джалла районарин хIаттарис буюрмиш акье пуне хуларин герек иде кIеджар хIезур акьас вахттуни. Хъара ме мегIракайил уйи Дагъуттандин Правительствойин Председательдин садпе заместитель Манвел Мажонц, Махачкалайин мэр Юсуп Умавов, хъара Дербентин мэр Ахмед Кулиев.
Луиза Гусукаева
