ЯгIайин ягъас ппара загьмат дивая рекъер бадала хье Дагъусттандиъ. Ме кардихъас Iайи вархал ушуна адава Агъул районра. Рекъер бадала ппара читин вахттар ушуная мисалас авал заманайихъас хаб. Райондихъди гъаре рекъ ая усра ппара читинф хьуная те вахттари. Авал заманайин хIа инсанарин ахттилатарил йиркIв алийичин мебури ахъаркьа магъуъ кьацIра машинин рекъ аф давуйи пуна. Ке цIайи ахьуная са инсан ккеттвере рекъ, хабди акьуная Iераба гъас вере рекъ, хуппай исар вахттар алттвередегьен акьуная машинин рекъ, амма ме Магъв рекъ бадала ппара читин ус э. Фас пучин гьер са угъал, ибхь угъудегьен ккерчIва рекъуьн багвар, дагьариас адаве хIа гъванар лап гьете рекъуьлди рукьуна, е инсандис, е машинис вере рекъракехIей илгвандава. Ме кардис ппара читин хьуная хье райондин рекъерин пешакурарисра. Миштти ичира чипифас вередегьен гъил фаттадивай загьмат дива мебури гьер ягъа рекъерил, адади усар мертт аркьай, ккерчIу уссарикк хаб цалар ккеркьай чипивас агърукьаф аркьай. Амма фи кар аркьайчира хIуькуматин манатин кумак фадавай фера акьас мункинвел вейдава. Мишттин вахттуни хIаттарира ул ачатуна кканве кар бегьем хьуб бадала.
ЯгIайин ягъа райондин рекъерин пешакурара хъара учи акьасе пуна кIили гъушу ОАО «ДСУ — 3» идарайинра пешакурари башламиш акьуная батIар аркьай хье Мамраш-Ташкапур-Араканский мост агъа рекъуьн 70-74 агъзур митIрин манзил. Мебур хъучучIуная Гъудгъуларин хIурихъас, Iайи чирхIи ая усарилас ара-ара аркьай алттивай ая куьгьна асфальт, геус суман Типпигъарин хIуриъра хIа мугIуйилас вартт алттивай хъучучIуная. Мебур э хIезурвелар хабди алихьас ккея цIае асфальтин удигьастти аркьаяттар.
Райондин хIаф Закир Каидовра «РСУ» Агульскийдин хIаф Омар Магомедовра хъай ахттармиш акьуне джалла усариъ аркьая курар, хабди акьудегьен, акьас ккимедегьен курарис кьиматра йине. «Зе багухъас зас пас кканде чугъсагъул джаллабурисра гьеме хье райондин рекъерин курар бегьем акьас чIал гьучихьунара, гъил гьучихьунара кумак аркьаттарис. Хьин фикир акьуна кканде хье халкьдинра, хье райондин иджвелихъас. Агьал сабицIи суман читинвелар айчира машинарис, инсанарис ме асфальт ккегъдивуная рекъуьас вес, хабди хуппай батIар акьу рекъуьас вес нушра хьасе», — пуне Омар Магомедова.
Гьалдис, 2019 исахъас мич хье райондиъ араара аркьай батIар акьуная 12 агъзур митIри рекъуьн, 44,5 агъзур митIрихъас 57 агъзур митIридегьен рекъуьн манзил. Ме иса «Безопасные качественные дороги» агъа нацпроектилди фикирдиъ ая райондин центрайиди рукьуна батIар акьас рекъ. ЙиркIурал акьасе гьеме машинарин рекъ Мамраш -Ташкапур — Араканский мост агъаф э ке ирхе рекъ хье багухъди гъареф. Ме рекъуьас 8 районариди вес мункинвел ая, хъара садтти сад э хье райондидира гъареф.
Батитай Габибулаева
