21-пе сентябрьди Республикайин премьер-министрди, дуьйин гьава гъутунаяхIела, нубат алдавай, Штабдин совещани завал акьуне.
Сергей Меликова-Дагъусттандин хIатти-буюрмиш акьуна, Республикайин Правительствойин хIаф- Абдулмуслим Абдулмуслимов кIилил алди, гуьбекъми, сеIэт якьударин хаб, РД-йин Ситуационный штабдиъ хIел аркьай уйи: фи акьуна кканди аячин 2-суткайилас вартт хъатIдаратIай, хIуьл алихьуна угъая угъалари акьуна завалар буш акьубас.
Джалла идарабурин, муниципалитетарин, лазим иде инихIеджатар хъучаркьа идабурин хIаттари, МЧС-дин хIаттарира ахъаркьай уйи: фи акьуна кканди аячин четинвелар хьуная мукьариъ.
Комунальный, аварийный службабурира, МЧС-дира кьацIра эл датай, кар аркьая шагьурдин угъаларин хьеттар авере мукьар мертт аркьай, Iэквар хъаттархьуная мукьарин трансформаторар дуз аркьай. Хьунайде курарихъ хъуттурфуна, йина зарарар ахтармиш акьуна, угъалари фидегьен зарар йинайчин хъуттурфуна куьчабурисна хуларис, ягIар акьуна, кьимат есе пуне Абумуслим Абумуслимова. Угъаларихъас ке Iайи четинвелар хьунаяф МахIачкьала, Каспийск, Избербаш, Дагестанские Огни, Дербент шагьурариъна Къаякентин райондиъ э.
«20-пе сентябрьдинхаб джалла аварийный службабури дагъузанди кар аркьая: нандиъ, фи зарар йинай чин хъуланди, аккедиву мукьар ягIар аркьай, мертт аркьаяфе,»- пуне Правительствойин Председатель Абдулмуслим Абдулмуслимова Штабдин заседанил.
«Джалла аварийный группабури кар аркьая. Сергей Алимовичас ахиран доклад багамин, сеIэт 8 хьас 15 дакьикьа ами акьуне. Гьалди хабра джаллабур экьве чун ая мукьариъ кар аркьай, акьу кардихъас агъай,»- пуне премьерди.
Дагъусттандин премьер хъуттурфуне Черкес-Озень агъа нецIун гьукъу мукьар фиштти мертт аркьаячугас. Черкес-Озеньдин гьукъу мукьарихъ хъуттурфанас, Дагъусттандин хIатти буюрмиш акьуна, Абдулмуслим Абдулмуслимов кIилил алди МахIачкьалайин хIаттар, Минприродайин, Минпромторгдин, МЧС-дин хIаттар ушуна уйи; мисаъ 19-20 -пе сентябрьди угъу угъаларин хьед ппара хьуна, гьукъуна, мугIарилас алайчи хьеттари багвулив фая мукьар аккедивуна уйи. Мевус гьукъубан багьана: пластикдин бутылкабур гьукъубанф и. МугIаригь гьукъуна те бутылкабур, МахIачкьалайин Ленинский райондин Речная агъа куьчайис ппара зарар йине. 2022- 2024-пе исари нецIв мертт акьуна, кIен уьркIе акьуба, нецIвун багвар фарчIундава пуне Правительствойин Председательди. РД-йин Минприродайин хIаф, Ратмир Расулов, учра ушуна, нецIвун багулив аркьая курарир алгъузуная .
«Хьуная зара, Iайвелар гьаттивас, сара гиштти хьеттин гъайшибар дахьас, министерствойи тич 12 машин гьикуная: эксковаторар, мугIаригь завал хьуна уйи ширкар гьаттивас, рекъерил къуттар фадахъасра кей, гебур (рекъер) цIуьппе хьас, грузовой машинар гьикуная, Чин алгъузуная, хьедегьен дахи мертт акьуна, ккиркIвас акьасе ме курар: хьед дузди, гьудукъай, верегъилди.»- пуне природайин ресурсаринра, экологин министрди. Дагъусттандин эпидемилогический обстановкайил Роспотребнадзор алгъузуная. Штабдин заседанил агьал ая инфекцибурин хIеларихъас Ирина Алжанбековнайи-РД-йин Роспотребнадзорин хIаттин заместительди — ахъакьуне.
«Дуьйин гьавабурихъ хъуттурфуна, рударин инфекцибурин итталарин алгъазийибар адава. Иттая агъай, духттирарилди аде инсанар адава,» — пуне ми. Ппара алгъуная хьед фарта мукьарил. ЯгIайин ягъас хьеттин мерттвел чIирди адава; инфекцибур гIая агъа кар адвава. «Чин ппара алгъузуная иттилар гъадиширай пуна, чафас вередегьенттар аркьая гъадишасра,» — пуне Ирина Алжанбековнайи. Дагъусттандин Роспотребнадзордин хIаттари агъая хальдис: рударин итталар гъадишас, иттархьегъилди духттирарилди шаб пуна, иттар дахьас уха хьеттил алгъузен, Iари бутылкабуриъ ая хьед дала ишламиш маркьа пуна.
Тамам Рамазанова
