Дагъусттан Республикайин миллатарин сиясатинра диндин курарин Министерствойин 35-фу ис хьуне.

1990-пе исан 22-пе ноябрьди ДАССР-дин Верховный советин Постановленилди миллатарин курарихъас арайил акьуне Дагъусттандин АССР-дин ХIуькуматин комитет.

Ме Комитет арайил акьуб асуллу хьуне читин, хIуьтте наразивеларилас. Наразивелдин бина хьуне репрессироват акьу халкьарин реабилитация, арандин джиларин алакъабур, халкьар пай акьуб, административный дазубур алийиб, хъара джуре курара.

ДАССР-дин Верховный советин председательди Магомедали Магомедова учин фикирдиъ ке лазим кар Дагъусттандис гIаттивуне, миллатарин арайиъ ислехIвел, Дагъусттандин халкьарин садвел, РоссийигI аркьая ишттараквел, гьеме хIуькуматис ке читин вегIдайи ухIуб. Багв къерехилас халкьарикк цIа кичикIа ахттилатарихъ хъучудушуб.

Ху республикайин разивелна аваданвел, садвелна сакинвел бадалди чиппин инсанвелдинра хIуькуматис лазимвелдин бурдж ирцIанди чиппин джигьил джанарна Iуьмурар пучакьу, магьшур ттурар ликIиная Дагъусттандин кIилин Iуьмурдин тарихдик: Комитетин садпе хIаф — Магомедсалих Гусаеван, Загир Арухован, Гарун Курбанован. ЯгIайин ягъа РД-йин миллатарин сиясатинра диндин курарин Министерствойи, кIилиъ Темирлан Абуталимов ай, арайил аркьа «Стратегии государственной национальной политики Российской Федерации на период до 2025 года» агъа проект. Пара загьмат дива гьер динарин, миллатарин арайиъ садвелна ислехIвел, нуьхIуьбат хIуьлмат ухIубан рекъуьъ.

«Лап йиркIуран даринариас мубарак хьурай Дагъусттандин Миннацдин пешакурарис ме хIаягъ! Зе хъугъуб хъая, чве пешакарвелдилас асуллу, садвелдилас, кардис вафалувелдилас асуллу хьуна хьефас аттрукьасе дамакъ фай ухIас региондин сакинвелна дусттвел! Чвахъ гьер сайихъ цIуппе сагъламвел, сакинвелна иджвел, Дагъусттандинра Российин иджвел бадалди аркьая кардин рекъуьъ хъара хIа агалкьунара хьурай!», — пуне Темирлан Абуталимова.

Салихат Малагусейнова