Мисала ая: «Хъуьхъе ччамдегьен идже зад киркьуфттава инсандин джандис» агъаф. Кея муфеIэтихъас пучин гьеме хъуьхъе ччаман, кена ке удигьай, ккеттирхIуна кканде, мин гудевел ая 98,8%.
Гьамиштти ичира микес кея муфеIэт чукь вей адава, кIилди герекди аядегьен тIегIем кимилгванде, рюхьес акьучира, джалла витаминар А, Е, Д — гIамилгуф кидавай, хьедра белок гIайчIуф, хъара ппара ве.
МуфеIэт хъуьхъе ччамакес ая Iу багухъас фикир акьучина: ухIас ве ме, ифалилас ппара гагьди, чIир вей дава. ГIелимари агъа чукь-чукьди IуьтIучин сагъ аркьа итталар остеопорозна рахит, кумак ве гIанасра, уларис Iэкв агубасра.
Ке идже некк — хIунинф, цIегьелан некк Iайи тIегIем алефе, идехIела ме ухагуна, хьед агIатуна кканде, зарар дахьас. Нагагь некк гьинанф кканчира ухучина шаккар гIахъуна, суратин ранг адис аркьа; нагагь уьтт гIадаркуна ухучин, сагъ аркьа гIанар-джанарин ягъниш кея усар.
Нагагь ягъдира ппара ухубара зарар ирцIанде силебарисра хьамхьамарис. Ама неккдигI уьтт гIихьучин, яра, некк ухастти мертте хьед хъударкухаб сивихъ, мегуна зарар вейдава джандис. Гьемиштти аркьай хьуная Пайгъамбарди.
Некк ппара ухучин зарар ирцIанде уларис, лекарис, дуьхIуьбарис. ИдехIела зарар дахьас, неккдигI гIадаркуна кканде уьтт е имбирь.

Салихат Малагусейнова