Авал заманайин вахттари далихуна дуламиш хьас ппара четин и хизанарис. Фас пучин, хал ацIу хизанарис Iеле гунисчира чара акьуна кканвейи, сасра задарихъас агъайра дава.
БицIи ами дадар бабари шиникквара вардиш аркьайи лирханди. Маларихъ хIуппарихъ гьикай, IуькIер уцай, кIурар артIай, язанар аркьай гьер са кардикк хIав ккей вардиш аркьайи. Эгера ариш — варишин курар алчархьухаб хулади манат акьуна гъареттара авейи.
Кар аркьа инсандис дуьньяйин нае кIилиди аттархьучира кар джикIенасе нандиъ айчира. Ая шиникквар чаб хIа хьуна чиппин фикир хьу вегIдайи йиркIурас кьабул пеша гIаттивуна гьеге рекъуьас вереттар, хъара бицIигунахъас мич чиппин дадан бабан пешайил вардиш хьуна гьеме рекъ чиппира гъареттар. Гьемишттин шиниккварикес сад э бицIибагьаларин Зейнуллагь. Зейнуллагь хуне 1981 исан 8-пе ноябрьди IебдулхIелиманра ФатIимайин хизандиъ.
Зейнуллагьра кей мебурин хизандиъ уйи 10 валад: ХIебибуллагь, РехIматуллагь, ГIибадуллагь, Нуруллагь, Пери, БицIируш, Iешай, Зухра, Наира. Iуьмурдин рекъуьн кьисмати мебур гьер усарихъди далгъуная, садра хIуриъ адава.
Авалдин вахттари ппара читинвелар агучира, ягIайин ягъас гьертти учис хал мукь акьуна дуламишди ая мебур чаб ая усариъ. Гьемиштти Зейнуллагьра э. Армиди ушуна адехаб 2001 иса хIуриас ушуне ме учин чияр чуппарилди Тульский областиди. Хабди хизанра акьуна мал къара ухIай дуламиш вей ая мебур Тульский областиъ Ботвинино агъа деревняйиъ. Хизан э мин Надият, хьибуд батIар шибера хъая мебурихъ.
Дуламишвел хьуне мебурин бицIи — бицIи мал — къара ккиланди гьеме бурин хайир ишламиш аркьай. Хабди 2017-пе иса келлайиди адина хIуькуматин къанунилди ме КФХ дахъуне. 2018-пе иса Зейнуллагьа гъушуне хIуькуматин майилдин грант. Тегунахъас мич хъара хIайи ккийина фермабура авадан акьуне мебури чиппин кар.
«БицIи вахттар че гьелбетта ппара читинтар хьуне. Фас пучин хIурин мукьуйиъ хIа хизан ухIасе пугуна лидегьен рехIет давуй. Бабасна дадас чиппин кураригьасна азиятаригьас чахъ хъучавес алтухъ мугьлат адавуй. Чин час чарабур акьуб кидавай хъара кумак акьас алчархьайи дадар бабарисра хулан кардис мал — къарайис гъил гьучихьай. Миштти пугуна зун зе бицIи вахттарил рази даваф суман хьасе. Те вахттари джаллабурин Iуьмур гьемиштти ий. Читинвелар айчира Iуьмур ппара шадтти вейи. ХIаттарис хIуьлмат, бицIиттарис нуьхIубат авейи. Фикир акьугуна, гьалдин дуьнья буллух ичира, инсанарин арайиъ нуьхIуьбат-хIулмат, баракат чIукь э. Зе насихIет э гьалдин джигьиларис, кьисмати нае джилилди адихьучира чве бицIи ватан, ху чIал, миллатин гIедатна ирс йиркIварин даринариъ афухIуб», — агъа Зейнуллагьа.
Гьеме чIаларил йиркIв алийигуна гъавурдиъ архьа ме учин йиркIураъ Ватан, бицIи халкь, дадан хал мехIелди ухIаяф.
Батитай Габибулаева
