Мегьрибан Абдуловнайин Iуьмурдин рекъ лап рекIве чишна э пешайис вафалувелдин, кьацIра бизар давей, йиркIуран даринариас хIуьлмат хъай халкьдин гIедатарихъас джафа дивубан. Мин пешайин рекъуьн бина хъучучIуне Махачкалайин культурно-просветительный училищейиъ, давам хьуне гьер джуре пешабурилди.
Ме гьер са пешайи ватандин культурайин Iуьмурдиъ учин хьил атуне. Баку шагьурдиъ хуна, Мегьрибана бицIигунахъас мич кедивуне хье хIа хIуькуматин ппара миллатарин культурана искусство. Баб мебурин, Абдулжалилова Салихат, дадра Яхьяев Абдул колхоздиъ курар аркьай загьматкеш инсанари. Гьемиштти загьматил, кардил гIешкъ алдий вардиш акьуне мебури чиппин шиникквара. Ай уй хизандиъ гIуьфу шиниккв, Iу чунна хьибу чи. Джалла гьате вегIдайин хизанар суман мебура арайиъ хIуьлматна нуьхIуьбат ай, сай сайис кумак аркьай гьертти учифас аттрукьа гъил гьучихьай хIа хьуне мебур. Махьтаб ккиркIухаб Мегьрибан ушуне Махачкала шагьурдиди хурас. Са агъзурна ерчIу вершна муйцIурна гIуьфудпе иса культурнопросветительное училище ккиркIуна адегъилди микес хьуне халкьдин театрдин режиссер. Ерхьи иса кар акьухаб Iу иса школа искусствойин директорвел акьуне. Хабди джуре кардил хьуне. Са агъзурна ерчIу вершна ерчIцIурна ерхьидпе исахъас у агъзурпе исасттегьен хаб халкьдин театрдин хIаф хьуне. Амма яратмишариъ гIешкъ ая йиркIв хаб дивуне художествойихъди. Iу агъзурна къана хьибудпе исасттегьен давам акьуне культурайин вакъиабурин тамашабур аркьай. 
ЯгIайин ягъара Мегьрибан Абдуловнайи давам аркьа учин яратмишарин рекъ, гегIенар рухубан кружокин хIавелди кар аркьай. Мера гьакIан кар дава, ме халкьдин гъилин иш — пеша афухIуна несиларилди фачилан пайдагъ, миллатин ирс хIисаб э, хье ватанин тарих э. Мебур гьакIан гегIенар дава — культурайин сир э. Ирс ухIа инсанарин Iуьмур лап рекIве чишна э, пешайис, ватанис вафалувелдин, мебури халкьдин тарихдиъ иджвелин хьил атубан. Авалдин вахттари ме курарис алтухъ фикир адавайчира ягIайин ягъа ппара ул ачарта. Фас пучин хье ппара миллатар ая зурба хIуькуматиъ ягIа гьер са миллатис хIуьлмат ая. Мебури гьертти учин хе чIал, миллатин тарих, ирс, гIедат гуланас атуна ккандава. Гьеме кардин рекъуьъ зейдайи загьмат дива культурайин пешакурарира. Ке хIа чугъсагъул хъая кар э ме ягIарвел, удигькIил акьуна бицIи несиларилди фачийиб. ДехIела идеф хьасе Мегьрибана шиниккварихъай кар аркьафра. Учихъ хъая михъ са кIиркI, МехIемад. Ме э бабан загьматин шегьид. Кканчира дакканчира бабан кар аргвай хIа хьунаф, учин йиркIвра бахил э мин, учин бицIи миллатил, бицIи ватанил, мин зурба тарихил.
«Зас ме кар хъара багьа э зе хIабабан, зе алттушу несиларин аманатна ирс идевелдира. ХIабабан насихIет ий зас гъилин гьер са пеша ягIай иджи э зе хуттул ягIар акье вас агъай ме курар. Гьемихъас иде таре, зун ме пешайил ппара бахилра идеф», — ахъаркьа Мегьрибана. Учи ме кардин рекъуьъ гьику исарихъас са пушмалвелра адава мин.
Гьалдин хабра пешайис, миллатис вафалувел хъай загьмат дивас джандин сагъвелна ачухъ йиркIв хьурай учихъ!
Салихат Малагусейнова
