Тталатт ягъа, 21-пе июньди кIилиъ республикайин Правительствойин Председатель Магомед Рамазанов ай акьу Дагъусттандин Правительствойин заседанил гъургъуне, «Устранение цифрового неравенства» агъа федеральный проектин мегIракабурин рамкабуриъ ай арайил аркьа связин читинвелар гьадихьубан, ме рекъ авадан акьубан суаларихъас. Гъургъубар хъучучIай премьер-министрди гIаттивуне «Устранение цифрового неравенства» агъа федеральный проектин ке хIа кьастт. Ме кьастт э, гьер са дагъусттанагьлийис сад суман цифровой мугьлат арайил акьуб, са читинвелдихъра хъуттудурфуна, яшамиш вере мукьариласра асуллу дакьуна. Магомед Рамазанова ме кардин джувабдарвел фаяттарис буюрмиш акьуне, свазин кардин читинвелар гьадихьуна дахи арайил акьубан рекъуьъ хIекьдан кьайдабур аттив пуна. Гьемиштти йиркIв фай джаллабур хъучушуна кар акьучин дала ме кьастт кIилиди адихьас хьасттава пуне. Рамазанован чIаларилди Дагъусттандин суварин, аранарин джиларрин, манзиларин тамашинвелди, музе хIурарин ппаравелди хIа гьуларикес хъара хIа загьмат тIалаб аркьа батIар кьадми связь арайил акьубан рекъуьъ. «Гьалдин связинра интернетин ахтилат дахи димари суалди андава. ЯгIа ме джалла, газ, хьед,  Iекв, рекъ суман лазим иде инфраструктура э. Гьеме гьер са услугайин кьадмивелдилас асуллу э ватанагьлибурин гIилмин, ариш – варишин, туризмдин, са чIалалди гьер са рекъуьн кардин кьадмивелра. ЯгIа хьин Iари ая кардин дава кьимат акьуна ккандеф, акьас аме курарин иде давафра ягIар акьуна, читинвелар гьадихьубан рекъра ачухъ акьуна кьастт кIили файшубан курарин кьиматра ягIар акьуна кканде», - пуне правительствойин Председательди. МегIракайин ключевой доклад фай гъургъуне РД-йин цифровой аваданвелдин, информацинра печатин министрдин врио Юрий Гамзатов. Ме кIвал акьуне 2022-пе исахъас мич инсанар чIукь ай рекъерин читинвелар ая хIурариъ «Устранение цифрового неравенства 2.0» агъа федеральный проекти мегIракабур арайил аркьая, мин рамкабуриъ ай арайил акьас фикирдиъ ая LTE-йин стандартарилди гьалдин мобильная связь, са вершалас са агъзур инсандилди дегьен яшамиш вере бицIи хIурариъ. ПроектигI мишттин хIурар 350 гIачихьуная. КIилди 2023-пе исалас арайил акьуная 135 связин объектар, мебурикес 54 акьуная 2025-пе иса, хьибудра акьуна ккиркIуне гьеме але иса. План-графикилди ме исан ахир верегунас арайил акьас йиркIураъ ая 86 базовый станцибур, 2030-пе исас хъара 183 объектар. «ХIурар гIачихьубан кар арайил аркьа джемеIетин фикирарна ниятара ягIар акьуна. Гьер иса Госуслугабурин порталиас аркьа сесер, найи хIур гIаттивайчин, сесер ппара хьу хIуриди удигьай гъа мобильный интернет. Са чIалалди джемеIетин диревелдилас асуллу ве хIур ме проектигI гIачархьуб. Гьемиштти мобильный связин базовый станцибурин кьадар 2023-пе исахъас мич вартт хьуная 22%, хьуная мебур 11 агъзурахъ хъучархьуна. Мебурикес LTE-йин технологин станцибурин кьадар гьеме 2023-пе исахъас мич Iудтти вартт хьуная, мебурин кьадар э джалла базовый станцибурикес 56%. Гьемишттин модернизацилас асуллу ий вартт ве мобильный связин кьадмивелра», - хабар акьуне Гамзатова. МегIрака ккиркIубарихъди хубджи лазим иде курарин буюрмишара акьуне.   Салихат Малагусейнова