Ахиран вахттари хье республикайиъ арайил аркьая ппара программабурна проектар. Ме программабур ачмиш акьубан кьасттунин рекъ лап хIа э. МисагI гIая здравохронени, гIилми гъадивуб, рекъер ачухъ акьуб, хIурар шагьурар авадан акьуб хъара сасра курара инсанарис иджвелин.

КIилди ме программабур арайил акьуб хье мукь, ватан авадан хьас, дараджа вартт хьас э. Кьанди Дагъусттандиъ хаб ачмиш акьуне цIае программа "Команда Дагестана" агъаф республикайин хIаттин врио Федор Щукинан фикирдилди. 

Ме проектихъас хабар йине махьтабариъ хурубар ккиркIуна идже кьиматар гъушу выпускникаррихъай гьучархьу ягъа, гьеме исан 24-пе июльди. Гьеме мегIракайил Федор Щукина ппара насихIетар йине гIилми хурас учIа шиниккварис. 

"Чве хурубари чвас йисе гIилми, чвахъ хьасе таджриба. Ме Iу карди э инсандис Iуьмурдин рекъ ачухъ аркьаф. Миштти идегуна чин шад э хье ватанагьлибурин идже санар хьубал. Час кканде чун хурубар ккиркIуна хаб адина хье республикайиди гьемисаъ кардин эессибур хьуна. Час лазимди ая идже хурубар кеяттар, кардиъ гIешкъ аяттар. Хьин джаллабури хъай Дагъусттандин аваданвел вартт акьас. Хъара ме кIвал акьуне республикайин хIелдихъас. Час канде чун кардин эессибур хьуна хье региондиъ.

Проект ачмиш акьубан кьастт э региондиъ яшамиш вея джигьилар кардик акьуб, хье регион хьудегьен авадан хьуб, ватанагьлибурин Iуьмурдин шартIар алтухъ акьуб. Гьеме "Команда Дагестана" агъа программайихъас чин са Iу суал алихьуне Агъул райондин майор полиции МП ОМВД Российин хIаттис Закрияев Магомед Магомедиминовичас. 2001-пе исалас мич э ме ми кар аркьай. 

"Асслам Алейкум джаллабурис! Шиникварин иджвел бадалди аркьая кар лап хIа фикирдин зурба кьастт э. Мебур Iуьмурдин шартIарилас асуллу э хье республикайин хьас ккея кар. Ме программа арайл акьуб бадала гIилмин хурубар фая, цlуппе кьастт фая, джигьиларис мункинвел хьасе кардин эессибур хьас хье республикайиъ. Хъара пас кканде Дагъусттандин хIаф Федор Щукин шиниккварихъай гьучархьуна мебурихъай гъургъуна насихIетин, муфеIетин чIалар пуне мебурис дуз рекъ агвар акьуне. Зун хъугъа "Команда Дагестана" агъа программа ачухъ рекъ э хье кардиъ гIешкъ аяттарис, цIуппе кьасттар фаяттарис кардин эессибур хьас хье региондиъ. Шиниккварис иджвел кеяф республикайис хайир кеяф хьурай программа "Команда Дагестана"", - пуне Магомед Магомедиминовича.

Наиба Гасукаева