Ке герек кар – инсанарин ахттигьарар ухIуб, вахттуни са багухъасра мушат дакьуна чиппис рукьа кумакин выплатабур ахъарукьуб инсанарихъди.

Гьеме кар арайил акье пуне Дагъусттандин прокуратурайис Российин генеральный прокурордин заместительди Сергей Бажутова. Хъара ме ведомствойин коллектив таниш акьуне Дагъусттандин цlае прокурор Денис Авдеевахъай.  
Сергей Бажутова тегIриф акьуне Авдееван, инсанарихъай аркьа кардин гъавурдиъ аяф э пуна. Генпрокурордин заместительди ме ведомствойин пешакурарис арайил акьуна ккане курарихъас хабар акьуне. Мин чIалалди агьал ке герек кар э – гьер са хьетти зарар йи хизандис вахттуни кумак акьуб. Ме зарар йи мукьуйиъ ппара хулар аккедивуная хьетти, 1,5 агъзур хал ккегъдивас верегъилдира адава, 2 агъзур хулас капитальный ремонт кканди ая. Ме кар бадала Бажутова хьудегьен дахи акье пуна буюрмиш акьуне межведомственый комиссибурис чиппин ахттармиш акьубан кар зарар йи усарил аларуцай.
«Хьудегьен тегIди акьуна кканде инсанарис хулар ккегъдивас кумак. ЯгIайин ягъас прокуратурайи ппара фикир ирцIандея инсанарин ахттигьар ухIубас, са мушатра дахьуна выплатабур ахъарукьагъилди. Прокуратурайи кумакар аркьая зарар йи инсанарис», — пуне генпрокурордин заместительди.

Федор Щукинара ишттарак аркьай уйи Дагъусттандин цIае прокурор Денис Авдеев таниш аркьа усал ведомствойин пешакурарихъай. Республикайин хIаттин чIаларилди Дагъусттан ппара ухьтан мукь э пуне хье хIуькуматиъ. Агьал республикайиъ сабицlи суман читтинвелар ая, зарар йи усар ккегъдивай кумакар аркьая, амма ме курарихъай барамбарди мисаъ авадан аркьая лап хIа инфраструктурайин проектара, ЖКХ-йин читинди ая курар арайил аркьая.

Батитай Габибулаева