Каспийск шагьурдиъ Али Алиеван ттуранихъ хъая спортинра джигьиларин дворециъ Российин халкьарин садвелдин исас бахш акьуна, Российин гуьна багулин халкьарин спортинра культурайин 17-пе Фестивальдин лап хIа мегIрака кIили файшуне.

Ме мегIракайин дахъубарилди Российин спортин министтрдин садпе заместитель Одес Байсултановра адине, хъара Российин сур хIуькуматин идарабурин вакиларна машгьур спортсменара адине. Ме фестиваль Iудпугелай э Дагъусттандиъ аркьай. 2010-пе исалас мин ттур э «Кавказские игры» дараджара гьер иса аркьаф кIилди Северный Кавказдин регионара гIачихьуна. 2021-пе иса проект хIа хьуне ЮФО-йин регионара гIачучIувелди. МегIракайил учинф иде ттура хьуне, ишттаракчибурин санра вартт хьуне ерийилас цIигIуьфу региондилди рукьуна. Хабди, кьанайи суман якьу регион хъара гIачучIуне. КIилди дуьньяйин хьибугелай чемпион иде Муслим Гаджимагомедова спортивный гъалибвеларинна агалкьунарин ишан иде факельра куькIуне. Спортивный бехIсарин авалдин гIедатилди стадиондин майданилди цIа кея факель атфайдине. Ме шадвелдин мегIракайигI ишттарак акьуне Дагъусттандин Правительствойин Председатель Магомед Рамазанова хъара Российин спортин министтрдин садпе заместитель Одес Байсултановара. Ме Iекве цIа ая вакъ ишан э гъалибвел къазамиш акьубан рекъуьъ, мерттевелдин, зигьинлувелдин, хъара гIешкъунин. Спортин Дворецил Фестивальдин пайдагъра гъадивуне. Дагъусттандин хIуькуматин хорди фестивальдин Гимнра акьуне. Сасра ягъа спортивный бехIсара хъучучIуне Дагъусттандин спортивный джигагьариъ. Ме лап хIа вакъиа э Дагъусттандиъ хъучучIуф, Российин гуьна багулин халкьарин, спортинра культурайин ХVII-пе Фестиваль. Дагъусттан Республикайин хIаф иде Федор Щукинан ттуранихъас салам йина гъургъуне хIуькуматин гьер регионариас ади гIуларихъай Правительствойин Председатель Магомед Рамазанов. Агъзуралас вартт ишттаракчибури, 16-д спортивный командабури, 10-д культурный делегацибури сад акьуне Дагъусттан. МебуригI гIая Крымдин, Севастопольдин, Донецкая Народная Республикайин, Херсонская областьдин хъара хье хIа ватандин джуре субъектаринра вакилар. Хье республикайис хIа шадвел э гIулар кьабул акьуб, мебур хье девлетлу гIедатарихъайна культарайихъай, Дагъусттандин ирсдихъай таниш акьуб. Зун хъугъа, ме фестиваль майдан хьасе регионарин арайиъ дусттвелна садвел цIуппе аркьаф, хъара таджрибабур духIуба аркьай цIае, иджвелин танишвелар вереф. ХIа мегIна ирцIанде ме мегIракайис, ттиан ис хIуькуматин президент Владимир Путина Российин халкьарин садвелдис бахш акьу ис идевелдира. Удигь гьая спортивный бехIсар, творческий выступленибур, хъара тамашин программабур. Джалла ишттаракчибурихъ агалкьунар хьурай! Салихат Малагусейнова