16-пе февраьди Агъул райондин модельный библиотекайин идарайиъ хьуне ху чIалан дарсар ирцIан ке идже мегIелим гIаттивубан мегIрака.
МегIрака кIили файшуне хье районойин пешакурари. Мисаъ завал хьуна уйи махьтабарин директорар, мегIелимар хъара мебурин шиникквара.
Ху чIалан дарсар ирцIан ке идже мегIелим гIаттивубан бехIсарин -мегIракайигI ишттарак акьуне Iу махьтабин мегIелимди.
Мебур э: Гусейнова Муслимат Гаджиевна Миссиарин махьтабин мегIелим, Нухова Нарият Исаевна Дулдугъарин махьтабин мегlелим. Ху чIалан дарсар ирцIан мегIелимарин агалкьунарис кьимат йис завал акьуна уйи жюри.
МисагI гIай уйи хье райондин хIаф Закир Гусейнович Каидов, райондин собранин депутатарин председатель Алиев Салих Курбанович, отдел образованин хIаф Курбанова Беневша Абдусаламовна, 50 истти Типпигъарин махьтабиъ ху чIаланра, Iуьрус чIалан дарсар ирцIан мегIелим Рамазанова Тамам Исрафиловна, 30 истти ЧIаарин махьтабиъ ху чIаланра, Iуьрус чIалан дарсар ирцIан мегIелим Ибр
агимов Играмудин Гасанович хъара Гъудгъуларин махьтабиъ Iуьрус чIалан дарсар ирцIан мегIелим Шабанова Алмас Галимовна.
Дахъуне ме мегIрака Роза Ахмедовайин мегIнилдина шиникквари ахъакьу хье чlалан шиирарилди. Мегlрака файшуне Динара Шабановайи.
Хабди гъургъуне отдел образованин хIаф Беневша Абдусаламовна.
Гаф йине Закир Каидовас. Ппара батlар насихlетин чlалар пуне ме хlаф бицlиф дапуна хье агъул миллатис.
«Учин сан дахьичира лап чlукь иде, хье бицlи халкьдин зурба тарих, ухьтан гlедатар, назик, ширин чlал афухlас ппара читин э. Зе лап хlа тlалаб гьер са хlурикес, гьер са хизандикес, гьер са инсандикес ме кардис хlа фикир йиб. Ке удигьай дадана баба, хабди хlурар — хулари, хъара мегlелимарира загьмат дивучин хье чlалра, миллантин мерlера цlуппе хьасе. Ме кардин рекъуьъ хьин загьмат дивуна кканде»,
— пуне райондин хlатти.
Хабди башламиш акьуне бехIсар. МегIелимари гьертти учин нубати ай агвар акьуне чиппин кардин агалкьунар. Агалкьунар агвар акьас мебурис йина уйи хьибу номинаци: медиа визитка, методическая мастерская, открытый урок.
Ме номинацибуриъ мегIелимари агвар акьуне чиппин гIилмин ягIарвел, чиппи дарс гъарегъилдира шиниккварихъай. Ппара тамаш верегъилди агвар акьуне мебури чиппин гьунарар.
Джалла агвар акьуна ккиркIухаб ахирахъди чIал йине жюрибурис.
Кканчира дакканчира бехIсариъ садпе мукь гIативуна кканве. Мебурин чIал сад хьуна садпе мукь ху чIалан мегIелим пуна йине Муслимат Гаджиевнайис Миссиарин махьтабин мегIелимдис, lудпе мукь йине Нухова Нарият Исаевнайис Дулдугъарин махьтабин мегlелимдис.
Мисаъ чугъсагъулар пуне чlал ухlубан рекъуьъ гъил гьучихьадегьенттарис.
Хабди мич адеттарис хье гIедатин ямагара акьуна дуьхьуьна уйи суфрара. Джалла ишттаракчибур рази уйи ме кардил.
Гьемишттин мегlракабур хьудегьен ппара аркьай кканде ху чIал ухIуб бадала. ЯгIа хе чIал гулучин багагь миллатра гуланасе.
Агъуларин игитарин иилди ликlи хье зурба тарихна, дадарин чlал, хьин мусра хум гьатуна ккандава. Хьин мебур пайдагъар суман несиларилас несиларилди рукьас акьуна кканде!
Салихат Малагусейнова
