Дагъусттандиъ хIуькуматин чIалар ухIубанра авадан акьубан программа адихьуная
РД-йин Правительствойин постановленилди 20-пе ноябрьди Дагъусттан Республикайин, хIуькуматин программайилди «Сохранение, изучение и развитие государственных языков Республики Дагестан» агъа программа кьабул акьуне.
КIвал акьасе, ме программа арайил акьубан лазимвелдихъас пуна уйи учи Халкьдин Собранис аркьа Посланиъ Дагъусттандин хIатти Сергей Меликова.
Ме программайин кьастт фи э пучин, хье хIуькуматин чIалар, хъара мисаъ ая бинайин бицIи миллатарин чIалар ухIуна, ягIар акьуна, авадан акьубан рекъуьъ лазим иде шартIарна мугьлатар арайил акьуб э.
РД-йин Правительствойин Председатель Абдулмуслим Абдулмуслимова тайрикь акьугъилди, ЯгIайин ягъа Дагъусттандин халкьарин чIаларин хIел агвар аркьа мебурин Iуьмурдин рекъ ухIубахъай алакъа ая кьайдабури. Дагъусттандин сур халкьарин чIаларис ягIайин ягъа хIа фикир йина ккандея, сур миллатарин кьадар лап чIукь хьуная, (ая вершарилас са Iу агъзурарилдегьен сан аяттар) ме кардиласра ппара асуллу э хьасмиде несиларихъди рукьас акьас хьуб мебурин чIал. Ибур дайичин мумкин кар э рукьас акьас дахьубра.
«Госпрограммайин кьастт э хIуькуматин хIавеларин, местное самоуправленин, гIилмин, гIилми ирцIан идарабурин, гражданский обществойин институтарин кар, чIалар ухIубан рекъуьъ цIуппе акьуна гуджлу акьуб. Ме кардин рекъ гуджлу акьучин республикайин халкьарин чIалара цIуппе хьасе. Гьеме программа арайил акьубакес кумак хьасе, арайил акьас лазим иде, правовой, организационный, научно-методический, хъара информационный шартIарна мугьлатар джалла Дагъусттандин халкьараин чIалар сад суманди ишламиш акьуна, республикайин миллатарин ирс суман ухIас»,
— пуне Абдулмуслим Абдулмуслимова.
Дагъусттан Республика – Российин Федерацин ке Iайи полиэтничныйна многоязычный регионарикес сад э. Мисаъ яшамиш вей ая хьибцIуралас вартт лап бинайин миллатар, вершна йицIударилас вартт чиппин кIилдин чIаларна нугъатар, культура, девлетлу гIедатар хъая халкьар.
Дагъусттан Республикайин Конституцихъ хъуттурфуна, республикайиъ хIуькуматин чIалар э, Iуьрус чIал, хъара Дагъусттандин миллатарин чIалара.
Хье Дагъусттан Республикайиъ яшамиш вередегьен джалла халкьарис кIилди ахттигьарар ая чиппин ху чIал ухIуна несиларис ягIар акьуна авадан акьас.
Ке магьшур идеф Iуьрусарин, аварарин, агъуларин, азербайджанарин, даргибурин, кумыкарин, лакарин, лезгибурин, ногаярин, рутуларин, табасаранарин, татарин, цIахурарин, чеченарин чIалар э.
ЧIал ухIуб Iари хIуькуматилас давай гьер са миллатилас, миллатин инсандиласра ппара асуллу э. Гьер сайи учин хулан гIанаъ ху чIал фиштти ухIучин, гьемиштти валаятиъра мебурин чIал афухIасе.
Салихат Малагусейнова
