Хьуне агъа хьундава агъа ппара бахттлу са Iул. Яшамиш вей уй ме рагIуъ, мисаъ гитанра адава агъай лап шадтти. ХIа пай Iуларис гуджлу задаригьас гучIа хIела ме Iулу хIу акьуна уй учин кIиркIас дуьйин варттал ке гуджлу зад фи ичин гьетин руш сусди акьасе пуна.
Фикир акьуне Iулу, фикир акьуне, амма рагъулас гуджлу са задра агундава мис.
Рекъуьъ учIуне Iул кIиркIас рагъ хъаттиянас.
Рагъу джуваб акьуне мис: - Училас къирибур гуджлу э пуна.
"Къирибури загьас джил джин аркьа", - пуне.
Ушуне Iул къирибурилди, ме джуваб акьуне: - Училас кулак гуджлу э пуна.

Кулаки зун зас ккане усалра кехIей гъузанас адартай учис ккане багулихъди гьика пуне ме.
Ушуне ме кулакилди. Кулакира джуваб йине Iулус: - Училас дагьар гуджлу э пуна. Нагагь зе удигь дагьар гьучархьучин зафас зе рекъ давам акьас вейдава пуне.

Гьал фи э аркьаф? Фикир хьуне Iулун. Гьал сара чара адава весе дагьарилдира пуна учIуне ме хабра рекъуьъ.

Дагьарин джувабра хьуне мис: - училас Iул гуджлу э пуна. Iулу заал кIилди йирхIунар аркьа, гьер багварихъас улудар кедихьа, мин удигь зафас фера акьас вейдава.
Мишттин джуваб унихьуф Iул ппара шад хьуне. Лап хIа дамакъин гIинчI фай ушуна хулади, акьуна лап гурлу цIакIинра, файдине кIиркIас Iулун руш.

Салихат Малагусейнова