Са ягъра дахьуф суман алттушуне 2025-пе ис. ХIисаб акьу ягъар э амеф цIае исан хIаягъарин каникуларин. Махьтабариъ ая шиникквар кьарар ккидай гъузуна аве каникуларихъ, гьелбетта курарил але инсанар генара гъузуна аве выходной ягъарихъ.
Исан арайиъ вере хIаягъар ппара ая. Мебур э гьерджурайин тарихдин, диндин, халкьдин миллатин гIедатарин шадвелдин, хъара сасра джурайин. Найи хIаягъ хьучира хьин хIулмат акьуна мубарак аркьа гьер миллатарин халкьарис.
ХIаягъан мегIракабур маджлисар ке идже багьана, хъара нушдин кар э завал хьас мукьу-кIиларис, хулаъ ая хизанар, гъурбатиъ ая багу — кIиларис.
Са усал завал хьуна, ахттилатар акьас, авалдин идже вахттар кIвал акьас. Хъара иджи э эгена са хизандигI сасра миллатарикесра гIайчин. Миштти генера мункинвел ая ягIархьас гебурин гIедатар тIул-тIебеIетар ямагар. Гьер са хIаягъан мегIракайин ухшар э садпеф хIа хизан хабди йиркIураастти акьуная гIедатин ямаг. Хьин хIулмат ухIас ягIа халкьар э миштти идегуна хьин гIедатарис ямагарис салхушдинттаре мусс хьучира.
Гьелбетта гьер миллатихъ хъая чиппин гIедатин ямагар. Магьа кканчин хье агъулаъ ая хIурарин инсанарихъ хъая чиппин гIедатин ямагар.
Агьал зун ликIенасе буршагъарин хIуриъ машгьур иде ямагарин ттурар. Ке адлу ямаг э мебурин якк гIая хинкIарна куче муссу, хъара ашар (нирхIин, бурунзин, хабди дигавур (чIикьенферар), ккуккалаяр (кьутIурар), балгвар (теIдин чIикьенферар), сакIлар (Iуьферар), сунтIутIаяр (тIубантаяр), ттурахинкIар, чIих але музе хинкIар, алджирар, уджу калтуфар, иттеттарикес Iесида. Шиникварин йиркIв шад акьас хIаягъари аркьа бекъелекъеярна уркьар.
Гьалдин заманайи Iеле сурсатар бул хьуная ямагарин ттурара алтухъ хьуная. Амма бинайиас хъая ямаг ке адлу хайир кеякеяттар э. Миштти идегуна хъучавере цIае исан выходной хIаягъар каникулар, багьана, мункивел э багу — кIилар завал хьуна ширин, дурус иде ямагар акьуна авалдин вахттар кIвал акьас. Гьемишттин алчушубари э хьехъ хъая ке багьа гIедатар ямагар ухIас кумак аркьаф, сасра миллатарин арайиъ нуьхIуьбат-хIуьлмат ухIаф.
КIвал акьасе хье хIуькуматиъ хъучавере цIае ис бахш акьуная миллатарин садвелдис.
Хье хIуькумат ппара миллатарин, гьер динарин халкьарин ватан э. Хье ватан хье дамакъ э. Хьин ухIуна кканде джаллабурин хIуьлмат.
Наиба Гасукаева
