ХIаягъ иде кIилди Российин джалла миллатарин садвелдин Ягъ
ХIуькумат пугуна ппара мегIна ая ме гафуниъ. Гьеме са чIалу завал аркьа кIилди джемеIет, мебурин фикирна ният, гIедатарна ирс, культурана тарих. Гьер са хIуькуматин Iуьмурдин тарих кьацIра хъаттдартIа тикрар э. Тикрар э мебурин халкьарин курар - лихунар, къанунарна - гIедатар.
ХIуькумат мисаъ яшамиш вере инсанарин ке багъри савкьат – Ватан э. ДжемеIетин садвелна дусттвел нае савкьатилас кканчира багьа э! Гьер са хIуькуматихъ, хIурихъ, хулахъ хъаве чиппинттар иде ХIаягъарин ягъар. Хье хIуькуматихъра ппара хъая гьемишттин ХIаягъар. Мебурикес сад э цIайи арайил акьу ХIаягъ иде кIилди Российин джалла миллатарин садвелдин Ягъ. Гьелбетта ке ппара милаттар къвал къвалуъ ай, чIал сад ий, сад - сайин панагьар суман яшамиш вере хье хIа ватандис ме ягъра ппара хIа э. ХIисаб дивучин Российиъ Iу вершарихъ хъучархьуна миллатар яшамиш ве. ХIаягъарихъас гъургъучин ая мебур лап дагь заманабурихъас мич хъаяттара кьанди арайил акьуттара. Ме хIагъас магьа ттиъ 21 ис э. ХIаягъан ягъ 4-пе ноябрь э. Российин миллатарин садвелдин ягъ джигьил ХIаягъ э. Ме кардин къанун кьабул акьуне 21 исан удигьай, ппара миллатар ая ватанин джемеIет сад акьубан мегIнара хъай. Хье ватанин вакилари икьрар акьуне тегуна ме хIаягъ акьучин ппара идже хьасе пуна. Фас пучин мебурин фикир и ме ХIаягъа хье халкьарин садвелна гIедатар афухIасе пуна. Хье халкьарин гIедатар, алттушудегьен курар, кьадар - кьисматар, Iуьмурдин рекъра кехIей сад э. Хье ватан чиппин гъили гъушасе пуна ади душманар мусс хьучира зир - зала акьуна гьишас акьуфе ватанагьлибури. ЯгIа гIедат идегъилди ме ягъ машгьур э хIуькуматиъ лап зурба хIаягъ суман. Гьемиштти зурбадалди къаршиламишра аркьа хьин ме ягъ. Аркьа концертар, спортивный мегIракабур, хье миллатарин гIедатарин бехIсар, ярмаркабур, хъара джуьре мегIракабура. ГIилминра научный идарабури ме ягъа аркьа открытый урокар, тарихдин экспедицибур, ишкиларин - китабарин выставкабур. Миштти ичира ке хIа мегIрака ме ягъа ве джалла Ватандин машгьур артистар гIая концерт. ГIедат идегъилди ме концертигI ишттарак аркьа хье хIа гьулари, общественный, политический деятеляри, журналистари. Мишттин мегIракабур аркьа гьер регионарин, районарин джемеIетари чиппин бицIи халкь бадалдира. Хье Агъул районра хаб чукIайдава мишттин мегIракабуригьас, мусс хьучира майил йина арайил аркьа концертар. Магьа мигелайра Агъул райондин ЦТКНР-диъ ме хIаягъас бахш акьуна лап хIа мегIрака кIили файшуне. Мисаъ арайил акьуне шадвелдин концертин программа. Мисал хье машгьур мегIничибури акьуне мегIнибур, шиникквари хуруне шиирар, акьуне лехъунар. Са чIалалди ме ягъан программайи джалла джемеIет са усал завал акьуна мебурин эл ккетуне. Гьер са инсандин вазифа э ватандин тарихдиъ ая мишттин ягъар, зурба вакъиабур хум гьадатуна чиппин валадарихъди, валадарин валадарихъдира рукьас акьуб. Гьавайи дава мишттин мегIракабур арайил аркьаф. Мебур аркьаттарин, инсанарикес тIалаб э, гьер миллати чипихъ хъая девлет - учин чIал, гIедат, тарихна ирс ухIуб. Салихат Малагусейнова