Гьер са инсандис садтти илгубалас Iае кар адава, хъара Iае э Iуьсе кIилихъди тек хьучин. Амма уч миштти хьасттава пуна сайинра эхIттиб хъавейдава. Джигьилди амий курар лихунаригьас сайира фикир аркьайдава садтти илгванасе пуна, хуппай са бицIиди яш вередегьен гъавурдиъ архьа, вахттуни хизанра дахьуна садтти илгванде учра учин читинвелара. Садтти илгуна, джандин сагъвелра адавай, фера акьас агъдарукьа вахттуни багулив йиркIв руцIа, Iегвалвел хъая, нае арайи кканчира гъил гьучихьас хIезур инсан багулив хьуб ппара хIа кар э. Гьемиштти хье вахттуни инсандин муш кеяфра, кумак аркьафра ве социальный работник. Сад гьемебурикес э Расулова Хадижат Абдурашидовна. 
Хадижат хуне 03.03.1975 иса Iебдурашиданра Битин хизандиъ Курагъарин хIуриъ. Хизандиъ ахьуная мебур 6 шиниккв, хьибу кIиркIна хьибу руш. Дад дахи кIина баба садтти лекул гъадивуная ме шиникквар. Чиппифас агърукьаф аркьай шиниккварира кумакар аркьай хьуная бабас. Баба кар аркьай хьуне пионер вожатывелди махьтабиъра.
10-пе класс хуруна ккиркIухаб Хадижат шувас ушуне Гъоарин хIуриди. 1998- пе иса кардик хьуне ме КЦСОН агъа пешакардин идарайиъ социальный работник велди. ЯгIайин ягъас ме кардик кар аркьай мин хьуная 28 ис.
Хадижатан гъиликк ккея 9 хIа инсанар. Мебур э сур ягъди начагъди аяттар, сур джандин кьуват андавай фера акьас даветтар, алчавере багу кIилар багулив фудаваттар. Хадижата гьер ягъа нубат хъихьуна вей аве мебурин дарди хIелар ахттармиш акьас. Гьинас фи акьуна кканчин ме хIеракат акьуна бегьем аркьа. Хадижат учра йиркIуран иджефра, сабура хъая дишагьли э. Учи аркьа кар йиркIв фай аркьахIела ме ахъаджихIа хIа инсанарисра ппара кканве Хадижат чиппихъди адегуна. Сабура ппара герек э ме кардик, фас пучин хIа инсанар са-са арабури бицIи шиникквар суман хьуна аве, гъавурдиъ ихьасра ппара читин ве. Миштти идехIела агъа социальный работникдин джафа — гьер ягъан игитвелдин джафа э, амма сайисра багулив фаяттарис алдаргваф.
«Зе акьу кардин зас кьимат ирцIанди ая хIуькумати, амма гьемидегьен исари зун кар аркьуна эгера хабди кьимат адавай хьухаб зафас мебур фадихьас хьасттава, фас пучин зунра мебурихъди вардиш хьуная зе хулан хизанарихъди суман. Засра гьемебурикес муфеIет кея алчархьугуна Iекьулдин чIал пубра ппара хIа кар э. Ме инсанар лап хIа Iуьмур агунаттар э. Зас ягIа зе «хIабабар» захъра гъузуна авереф, кумакин курар суман гебурис чиппин дардара ахъакьас кканве. Гьемидегьен исари зун мебурин хулариъ кар аркьай захъас мебурин эхIттиб хъаттархьуфттава.
Хъара зас пас кканде зе пешакардин идарайихъасра. Зас ппара кьабулде захъай кар аркьа инсанар мусхьучира сад сайин хатир ухIуттар, фи кардис хьучира дуьхьуьттар, нуьхIуьбат, хIулмат хъай тIуршаттар. Зун ппара рази э чиппил. Джаллабурис сагъвел хьурай, дуьнья ислехI хьурай, нуьхIуьбат, хIуьлмат, баракат, ачухъ шад йирк вара хъай ирхе Iуьмурар кам дахьурай», — агъа Хадижата.
Хадижатас ппара хIа Iуьмурдин таджриба хьуная. Учин хIурин инсанара михъас иджи гъургъа, учи аркьа кар джувабдарвелфай йиркIураасти аркьа дишагьли э пуна. Ме кар бадала мис йиная чугъсагъулин кIеджара, дживизара учин пешакардилас. Джалла соцработникарин джандин сагъвел хьурай, чун дива загьматис чун сумана чвасра иджвелин кьимат йирай. Чвасра кьуват йирай гьалдин хабра йиркIв фай кар акьуна хIа инсанарин гьава гъадивас!
Батитай Габибулаева
