27-пе апрельди Дагъусттандин Правительствойин Председатель Абдулмуслим Абдулмуслимова ишттарак акьуне Дагъусттандиъна Чечняйиъ тIабиIетин зарарин читинвелар гьадихьубарихъас межведомственный оперативный штаби арайил акьу мегIракайигI. Ме мегIрака кIили файшуне РД-йиъ Российин ГУ МЧС-ин базайил, кIилиъ Российин МЧС-инра гражданская оборонайин Департаментин директор Олег Мануйло ай.

МегIракайин кардигI хъара ишттарак акьуне СКФО-йиъ РФ-дин Президентин полпредин заместительди Магомед Рамазанова, вице-премьер Рамазан Джафарова. ВКС-дин режимилди – Российин Роспотребнадзори, Росгидромети, федеральный Минстройди, Ростехнадзорди, хъара Минсельхозди. РД-йин Правительствойин Председательдин заместительди ахъакьугъилди, ягIайин ягъас аккедиву хуларна бусттанарин манзилар адава. Хасавюртовский райондиъ бетIур мертт аркьай курар кIили гъа. 19 агъзур дегьен хуларин ахттармишар акьуная. «Ке Iайи чин мисеIети алгъузуная суварин районарил, мисариъ оползнибур вере хIела.

Пешакурарин кIватIалари гьалдис ахттармиш акьуная 19 агъзуралас вартт хулар. Гьалдис ая кьайдабурилди хатIабур хьуттар 7 агъзур хулалас вартт ая (мебур чиппин кьайдабурилди пай акьуная – батIар акьуна кканеттар, яшамиш хьас вереттар, кIилди аккуьшуттар)», — пуне Джафарова. 13 ПВР-диъ ягIа 546 инсан ая. Дербентский райондиъна Махачкалайиъ манзиларин дезинфекция аркьа, РД-йин Роспотребнадзорди, Российин МЧС-и. Дагъусттандин МЧС-и, волонтерари, Донскойна Тульский спасательный центрарин кумакара хъай.

  Хасавюртовский райондиъ дезинфекцибурин курар акьуна ккиркIвая. Аме Адильотар агъа хIурин са пай, ме усра бетIур мертт акьуна ккиркIугъилди арайил акьасе. Зарар хьуттарис ирцIан социальный кумакихъас гъургъай РД-йин минтрудин хIатти Магомедзагид Кихасурова хабар акьуне, гьалдис арайил акьу выплатабурин кьадар 345 млн манат э пуна. 8190 гIерзайис йиная ме пул. Мебурикес сагелай ирцIан манатар – 5662 выплатайис ачушуне 88 млн манат. Хал мукь хъундаттарис – 2528 выплатайис 256 млн манат хардж хьуне.

Москвайиди угъубар файди циклондикес Дагъусттандисна Чечняйис хатIа кидава. Видеоконференцсвязин гъургъубаригIди гIачадине хIуькуматин Росгидрометин хIаттин заместитель Федор Козловра. Ме хабар акьуне, агьал Российин европейский багулис тегIди ирцIан циклоникес Дагъусттандисна Чечняйис са хатIара кехьасттава пуна. «Гьаме ягъари Дагъусттандин суварин районариъ мумкин э бицIи ибхьер угъалар угъуб. Мумкин э лавинабурин хатIабура хьуб. 30-пе апрельдихъас хъучучIуна мумкин каре гуьна багулин районариъра бицIи – цIуре угъубар хьуб. Хьиттарин курара арайил аркьа Дагъусттандиъ. Хьеттин читинвелар гьадихьубарихъас хабар акьуне РД-йин ЖКХ-йинра архитектурайин министрдин заместитель Салам Гасайниева.

Хьед хъучатуба учин кьайдайилди кар аркьа пуне ме: Махачкала, Каспийск, Избербаш, Буйнакск, Дагестанские Огни, Дербент, Кизляр, Южно-Сухокумск, Хасавюрт шагьурариъ.

Салихат Малагусейнова