Сагъвел инсандис йиная ке хIа савкьат э. Сагъвел хъагуна э инсандин йиркIв ачухъ вереф, улариъ Iекв вереф дунья салхуш вереф. Дуньяйил йиная ухьтанвелар, нигIматарин хайир-муфеIетар кIилди инсан бадалди э миштти идегуна сагъвел ухIуна кканде вахттуни. Гьелбетта иттал сайира масса ирцIанф е гъуршанф дава. Ге ве джанди вас ирцIан хабар э учин хIелдикес. Миштти идегуна инсанди фикир йина кканде вахттуни хъучушуна кканде иттал сагъ акьас. Ме кардин рекъуьъ йиная мункинвел э медицина хъара джерехIвел. Медицинайиъ хIа пай ишламиш аркьа дарманар, джерехIвелдин рекъуъ ишламиш аркьа хьес дуньяйил яратмиш акьуная нигIматарилди э хьед, IуькIер, тукар, нахширар. Гьелбетта мебур ишламиш акьубан къайдабур ягIай кканде.

Сад мебурикес медицинайиъ ишламиш аркьаф э хIуьтIри агъа нахшир. ХIуьтIри пугуна нае итталис кумак хьасегьан мишттин нуш давере нахшир пуна фикир ве. ХIуьтIри джерехIвелдин рекъуъ ишламиш аркьай хьуная лап авалдин вахттарилас мич. Медицинайиъ мебурикес аркьа джерехIвелдис агъа ( гирудотерапия).

Сифтта хIуьтIри джерехIвелдин рекъуьъра ишламиш аркьай хьуная хье давур хьастти Iу агъзур исан удигьай Египетдиъ. Гьеме хIуькуматихъай барамбарди Индия агъа хIуькуматиъра ишламиш акьас хъучучIуне гирудотерапия. Агъа Индин медицина авалдин заманабурилас мич агьалра кехIей лап гуджлу хIисаб аркьа пуна. ХIуьтIрибурин джерехIвелдихъас ликIиная Авиценнайи (Ибн Сина) агъа дагьзаманайин вахттари ая джерехIчи учин "Канон врачебной науки" агъа китабик.

ДжерехIвелдис хIуьтIрин ишламиш аркьа хьирхь. Агъа мебурин хьирхьигI гIая пуна 1000 рукьуна биологически активный соединенибур мебурикес джандин сагъвелна кьуват лазим вере белокна пептидар гIая 40-50 дигьен. Гьеме нахширдин хьирхьигI гIая гирудин агъа ферментра. Ме ферментик ппара итталарис дарман кея. Медицинайи суман гирудотерапия ишламиш аркьа косметалогиъра. Итталарис рехIмис ишламиш акьастти сифтта хабар гъушуна кканде ягIа духттурарифас гьучушуна акьуна кканде ме кардин кеспи кея инсандилди.

Гьеме гирудотерапияйин джерехIвелдихъас сагъвел ухIубахъас са Iу суал алихьуне чин Саидова Гюльмира Магарамовнайис. Гюльмира Магарамовна хуне Агъул райондин Буршагъарин хIуриъ хIа хизандигI. БицIи агунахъас хаб Гюльмирайин гIешхъ уйи медицинайин хурубар акьас военный медсестравелди кар акьас. Махьтабарин хурубар ккиркIуфна сад ме учIуне хурас Каспийск шагьурдин Медучилищейиъ акушерское дело агъа курсариъ. Мисан хурубар ккиркIуна учIуне ме хурас Махачкалайиъ психологдин курсариъ. Хабди, хаб учIуне хурас массажистин курсариъ СанктПетербургдиъ. Мисаъ са исан хурубар ккиркIуфна сад Гюльмира Магарамовна хьуне кардик Каспискдиъ Целитель + агъа поликлиникайиъ шиникварнра хумбарин массажиствелди. Мисаъ ме кар акьуне 2009-пе исалас 2013-пе исалдегьен. Хабди учин хизан хьухаб ушуне Свердловский областьдин Асбест агъа шагьурдиди.

Гьемисаъра давам акьуне учин хурубар медицинайин рекъуьас хуруне "Медицина и Качество" агъа Государственный учебный центрдиъ. Хурубар ккиркIуфна сад Гюлмира хьуне кардик Свердловский областьдин Асбест агъа шагьурдиъ Реабилитационный центр "Радуга" (ГБУ СОН СО) агъа мукьуйиъ.

 2017-пе иса ме хаб адине Каспийскди учин хизанра хъай. ЯгIайин ягъас мин шиникквар бицIи ай хIуькуматин кардил айчIвас мункинвел адайчира амма учин массажиствелдин кар давам аркьая хулаъ.

Ме кардихъай барамбарди гирудотерапияйин процедурабура аркьа Гюльмирайи.

Гюльмира Магарамовнайин чIаларилди Сагъвел хьес йиная аманат э, иттал ве джанди ирцIан хабар э. Гьер са итталис рехIми акьас йиная тIебиIетин нигIматар медицинайин ачухъвелар.

Сифтта итталис кумак хьас гьучушана кканде духттурарилди сагъвел ухIас ишламиш акьуна кканде гьер са джандис хайир муфеIэт кея шейъ. Гьемиштти гирудотерапияра э. ХIуьтIрин хьирхь ппара дарман кея фермент э амма ишламиш акьубан кьайдабур ая мин. Ме терапия дадуьрхье итталара аве мункин э инсандис дадуьхьубра.

 Миштти идегуна сифтта ишламиш акьастти гьучушуна кканде духттурдилди.

 Сагъвелар хьурай чвас джаллабурис-пуне Гюльмира Магарамовнайи.

Наиба Гасукаева