Гьер иса ноябрьдин вазалан ахиран хIефттайин эльхIед ягъа аркьа бабарин хIаягъ. Ме ягъ хье хIуькуматиъ тастикь акьуне 30-пе 1998 иса январьди. Иса Iу хIаягъ гIаттивуная, бабарин ягъ ноябрьди, джалла хумбарин ягъ 8-пе мартти.
Гьемиштти гьер иса агъламиш аркьа бабарин ягъ хIа хIулмат хъай гьер миллатин инсанари.
Дад хулан эесси э, амма бабан вазифа хIа э. Хулан цIуфул ухIаф, умма-тухум давам аркьаф, шиниккварис тарбия йина вардиш аркьаф, гIилмин рекъ ухIаф кIилди гьеме курар кIили гъареф баба э. Бабан кьимат хIа э ме дуньяйиъ.
Бабас мусульман гIилмира йиная лапп хIа дараджа, хьес джаллабурис унихьа чIал э «Джаннат бабан лекун кIенак ккея».
Пас кканде бабарис гьер сеIети гьер ягъа кьимат хIулмат акьуна канде.
Гьеме хъучавея бабарин хIаягъа зас ликIенас кканде мигелай зурбдалди диндин, гIилмин рекъ ухIая, учин хизан арайил акьу дишагьлихъас Ибрагимова Айша Ибрагимовнайихъас.
Ибрагимова Айша Арсугъарин хIурин дишагьли э, хуне Дербентиъ хIа хизандигI. Ай уй мебур якьу чура хьибу чи. Шиникварикес ке хIаф и Айша. Мебур бицIи амий дадар бабарис вес кканхьуне хаб хIуриди. Арсугъаъ мебури чиппин дуламишвелар акьуне колхоздин курар аркьай, мал-къара ухIай, хьеяр арайил аркьай, кьвадилкьванар аркьай. Хизан хIаф ичира амма те вахттарин читинвеларихъ хъуттурфуна дадана баба арайил акьуне шиниккквар гьер багварикес хулан кардин, хурубарин гIилмин гъавурдиъ ай.
Авалдин вахттарихъ хъуттурфуна махьтабарин хурубар йине. Шиберис ягIар акьуне хье гIедатин курарикес хьияр арайил акьас, кьвадилкьванар акьас.
Хабди Айшайхъ хьуне учин хизан Арсугъарин хIуриас Ашуралиев Магомедсадык Гасасаевич. Са вахттра дахьуна хизан мин дембедан ушуне хIукуматин удигь бурж йис армиди. Армиас адехаба хьуне мебурихъ шиникквар. Хулаъ бицIи шиникквар айчира ушуне ме хурас Махачкалайиъ Финасовый техникумдиъ.
Айша пппара разивел фай гъургъа учин хизандихъас. Фидегьен учин хизан байирдиъ хьучира читинвелар агвас атуфттава агъа учис. Хурубар ккиркIухаб Магомедсадык Гасасаевича кар акьуне мегIелимвелди Арсугъарин хIуриъ. Са гагьра дахьуна мебур айчIуна ушуне Дербент шагьурдиди. Мисаъ кар аркьай шиникквар хIа акьуна мебурис хурубар йине ягIар акьуне мусульман гIилмибурикесра. Айшат Ибрагимовна гьемишанди учин хизандис фиттис хьучира чIалунра гъилинра кумак аркьай хьуне. Шиникквар са кьайдайи кегъархьу вегIдайи шуй кIине, амма
Айша учин валадарин кIилил йиркIв цIуппе акьуна гъузуне. Хабди кIиркIан насихIетилди ме учIуне диндин гIилми хурас Махачкалайин Исламский университетиъ. Гьеме вахттунис Айшат Ибрагимовнайис и 52 ис. ГIуьфу истти гьемисаъ ягIар акьуне учис мусульман гIилмибурикес, Кьуран хурас. Гьемисаъ хурубар аркьай кар аркьай хьуне шиниккварихъай. 2011-пе иса ккиркIуна хурубара Махачкалайиас Муфтиятин ахттигьарилди Айшат гьикуне кар акьас Дербентин отдел просвещениъ.
ЯгIайин ягъас гьеме кар аркьая гIилмин рекъуьъ.
Айшат Ибрагимовнайин чIаларилди мин кьастт э хьудегьен хIа хьил атас гIилмин, хье кегъархьая джигьил несиларис.
Ме насихIет аркьа джигьиларис чиппин дадарин гIедатар, ху чIал, ватандин ирс ухIуна чиппин валадарилдира рукьас акьуб.
Наиба Гасукаева
