Дагъусттандин хIаттин врио Федор Щукин кIилиъ ай гъургъуне фи мегIракабур аркьайчин Россиийин милатарин садвелдин ис бадала.

 10-пе августти Дагъусттандин хIаттин врио Федор Щукина файшуне Республиканский организационный комитетин заседание, мисал гъургъуне акьуна ккане мегIракабурихъас Российин миллатарин садвелдин ис бадалди. 

Дагъусттандин хIаттин вриойи кIвал акьуне, ме 2026-пе ис хье хIуькуматин хIатти арайил акьунафе Российин милатарин садвелдин ис э пуна. Ме кардин кьастт э милатарин арабур цIуьппе хьуб, арайиъ нуьхIубат хIуьлмат ухIуб, сад сайин гIедатар йиркIуралас гьадатуб. ХIекьдира ме кардин кьимат агвар акьуне хьидин угъалари инсанарис зарар йи вахттуни.

"Мишттин са балайин кар алчархьугуна сайира хабар гъуршандава вун фи миллатикес э, ве дин фи э пуна. Кумак адине джалла багварихъас - гьемилди агвар акьуне инсанарик инсанвел кеяф", - пуне Федор Щукина.

ХIатти гьерттис чугъсагъул пуне, зарар хьу инсанарис кумак акьубан, хIуькуматин сасра регионарин хIаттарис, спасателярис, муниципальный районариас аде волонтерарис - са чIалалди джаллабурис, кумакин гъил гьучихьудегьенттарис чин гIадава пуна эдекьуттарис. "Гьеме кар хIекьдира миллатарин садвел э, милди мебури агвар акьуне чаб гьер са кардис кумакин дусттар идефра", - пуне Федор Щукина.

 Региондин хIаттин вриойи кIвал акьуне, республикайиъ гьер джуре программабур арайил акьуная пуна. Мин чIалалди садвел агвар аркьаф чIаларилди дава курарилди э. 

"Хъара ме 2026-пе исахъди цIае хIаягъара гIачархьуная. Магьа 30-пе апрельди садпегелай акьуне Российин бинайилас чукь ая милатарин ягъ. 8-пе сентябрди хьасе Российин милатарин чIаларин ягъ. Ме ягъ гьакIанди гIаттивунаф дава - ме ягъ э хье шаир Расул Гамзатован ху ягъ. Гьеме хIаягъа хъара иджи агвар акьасе гьер са милатин чIалра, гьертин культурара - гьемилди инсанарин садвелра агвасе", - пуне хIатти. 

Зарема Бутаевайи хабар акьуне чиппин министерствойиъ арайил акьуная культурный программабур ме исас. КIилди кей фикирдиъ ая акьас 84 хIа мегIракабур, са пай мебурикес акьунара ая. МисагI гIая - концертар, фестивалар, конференцибур, форумар, спортивный акцибур джигьиларин. Гьеме джуре мегIракабуригI гьалдис ацIуна инсанари ишттаракра акьуная, сасра регионариасра хIуькуматариасра. Бутаевайи хъара хабар акьуне гьеме исан арайиъ республикайин хIуькуматин театрари, концертар аркьа идарабури, музеяри худтти агвар аркьай аяф э пуна хье дагъусттандин культура гьер джуре Российин регионариъ. Мебур уйи Москвайиъ, ДНР-диъ, Запорожский, Херсонский, Ростовский Оренбургский областариъ, хъара сасра регионариъра. "Арайил акьу гьер джуре форматин культурный проектарилди ме ис ппара иджи хъучучIуне, хъара Iайи цIуппе хьуне халкьдин садвелдин арабур", - пуне Бутаевайи.

8-пе сентябрьди - Расул Гамзатов ху ягъа - Владимир Путинан указилди Российиъ садпегелай акьасе мегIрака миллатарин ху чIалан ягъ агъаф. Дагъусттандиъ ме ягъас хIезур акьуная ппара хIа культурный программа. Гамзатовский литературный фестивалиди адесе писателяр Российин гьер джуре регионариас, хъара сасра 6 хIукуматиас гIулара адесе. Ме программайигI гIая - гьучархьубар, шиирар хурубар, презентаци "В поисках Расула" агъа документальный кинойин, хъара сасра мегIракабура, ме мегIракабур меркездиъ акьуф суман, хъара сасра муниципалитетариъра хьасе - учин ватандиъ Хунзахдиъра, хъара Гунибдиъ, Дербентиъна Каспийскдиъра. Ке хIа хIаягъан мегIрака хьасе Русский театрдин удигь гьая майдандил. Мисаъ джемеIетисра республикайиди ади гIуларисра акьасе концерт дагъусттандин артистари, фольклорный коллективари, хъара творческий коллективарира сасра регионариас адиттари - Чувашиас, Удмуртиас, Башкортостандиас, Марий-Элдиас, Северный Кавказдин республикабуриас, Краснодарский крайдиас хъара Российин сасра областариасра.

9-пе сентябрьдихъас -15-пе сентябрьдисттегьен Махачкалайиъ ая Сулейман Стальскийдин ттур але бульвар хьасе садвелдин исан площадка. Мисаъра хьасе концертар, выставкабур, ярмаркабур, хъара сасра мегIракабура. Хъара сентябрьдин програаммайигI гIачархьая "Вместе ради единства" агъа марафонра. Ме акьунаф Дагъусттандин халкьдин садвелдин ягъахъди э. Октябрьдин вазалара ахьасе гьер джуре мегIракабур. Ис ккиркIвасе 4 ноябрьди миллатарин садвелдин ягъан хIаягъа. Российин миллатарин садвелдин исан мегIракабур ме исан ахираристтегьен ахьасе.

Батитай Габибулаева