ХIуьрар хуларин арайиъ нуьхIуьбат хIуьлмат хьуна кканде. Хъара идже кар э сасра милатарин хIурариди алчушуб алттушуб ухIубра.

Типпигъарин махьтабин цIае ис башламиш акьуне гьеме кардилас. Ушу хIефттайи мебурис хабар адине багулив фая Хивский райондин Хероджарин махьтабин ттураниас чиппин мегIракайигI ишттарак акьас шаб агъаф.

19-пе февральди Ватан ухIа эскерарин хIаягъна миллатарин ху чIалан хIаягъ багу хьу ягъа Хероджарин махьтабиъ акьуне Россиийин миллатарин садвелдин ис э пуна хIа мегIрака.

Мич ушуна уйи Агъул райондин Типпигъарин хIуьрин махьтабин завуч Мегрибан Абдуллаевнара ДШИ-йин директор Роза Гашимовнара хъай чиппин гъиликк ккея лехъунигI гIая бицIи шибера.

Мебури ме мегIракайигI агвар акьуне авал заманайин агъуларин лехъун, аликIуна садсуман берхIемара кехъуна арсуран манатар, камарар гъиларив гъушуна бицIи горара фай.

Джалла ме мегIракайигIди ади гIулар ппара бахил хьуне мебурил. Хъара мебури ахъихьуна агвар акьуная хье райондихъас видеороликра.

«Чугъсагъул хьурай Хероджарин махьтабис гьемишттин мегIрака арайил акьуттарис, хъара часра йиркIурал акьуна унахъубал. Чинра чвал рази э, ппара батIар мегIракара хьуне, шиниккварисра тамашабур хьуне. Гьемишттин мегIракабури э миллатарин арабур ухIаф. Зе муш кея ме джуре мегIракабур хъара ппара хьас аме пуна хье Дагъусттандиъ»,
— пуне Роза Гашимовнайи.

Агъул райондиас кидавай мич хъара сасра багулив фая районариасра адина уйи.

Гьемиштти мегIракабур хьудегьен ппара аркьай кканде гьер районариъ. Фас пучин гьеме карди агвар аркьа джемеIетин миллатарин арайиъ ая дуствелна садвел.

Батитай Габибулаева