Махачкала шагьурдин «Россия – моя история» агъа паркуниъ хуш - бахш акьуне Дагъусттандин цIасадпе классар ккиркIу шиниккварис, мебурин хурубан рекъуьн зурба агалкьунар бадала. МегIракайигI ишттарак акьуне Дагъусттандин хIаттин врио Федор Щукина, республикайин Халкьдин Собранин председатель Заур Аскендерова, хъара премьер-министр Магомед Рамазанова.

«Хьин гьемисал завал хьуная, гьунарлу, чиппин кьастт фая, загьматил йиркIв але джигьил дагъусттанагьлибурис майил акьуна мебурин йиркIвар гьава акьас. Фас пучин мебури чиппин агалкьунарилди, загьматкешвелилди хье республика иджвелин багухъас машгьур акьуне кIилди Российин дараджайигI. Чве гьунарар – мебур Iари чве агалкьунар дава, ме кар шегьид э, Дагъусттан Республикайиъ джигьил несил ахьубан, республикайин давай кIилди хIуькуматинра хабдин Iуьмурдихъ хъучавес вереттар. Дагъусттандиъ Iекьуллу несилар кегъархьебан, хабди муфеIет гъареттар хье республикайис суман кIилди хIуькуматисра», - пуне региондин хIатти.

Махьтаб хуруна ккиркlуна идже  кьимат хьу шиниккварис Федор Щукина йине сертификатар. Ме иса 100 балл хьу шиникквар Iудтти ппара хьуная ушу исалас: 2025-пе иса 33 шиникквдис хьуна уй. Хъара вартт хьуная 11-пе классиъ иджи хура шиниккварин санра: 33 шиникквдис хьуна уй, 95-99 балл хьуттара уй гьер джуре предметариас. Федор Щукина верш агъзуран сертификатар йине Iуд – хьибу предметарин ЕГЭ-буриас верш баллар хьу шиниккварис, хъара Всероссийский олимпиадабуриъ гъалиб хьуттарисра. КIвал акьасе, стобальникар Дагъусттандиъ ме иса 52 ая, Iу шиникквдикес хIуькуматин ке иджеф хIисаб аркьа Всероссийский олимпиадайин призерар хьуная. Гюльмира Халифатова, Дагъусттандин ЕГЭ-йин тарихдиъ хьибу верш балл гъушуф садпеф идеттис хьибу верш агъзуран сертификат йине. «300 балл – ме гьелбетта лап хIа э, амма зе хъугъуб хъая ме сифтта кIил э пуна», пуне выпусницайи.

Гьеме мегIракайил Федор Щукина арайил аркьая «Команда Дагестана» агъа цIае кадровая программайихъасра хабар акьуне. Ме проект учин ватандин читин суалар иджвелихъди хIел акьас хIезурттарис э. Мич рекъ ачухъ э кканедегьенттарис: мисаъ илгванттарисра, джуре регионариъ хурас вереттарисра», - тайрикь акьуне Дагъусттандин хIатти. Заур Аскендерова наградит акьуне ЕГЭ-йин са предметиас верш балл гъушу шиникквар. «Ме гьава балларин кьабахъ лап хIа загьмат, алучIуб, гьелбетта хъара гIилмихъди кканхьун хъая. Чве удигь хIуькуматин ке идже университетарин раккар дархъая. Чун чве удигь лап гьава дараджа агьийине, зун хъугъа чун ке иджеттар хьас йиркIвариъ ай зурба кьасттарихъ ахъихьасе. Зас чугъсагъул пас кканде мегIелимарис, тарбия йиттарис, насихIечибурис, чве дадар – бабарис. Чве загьмат че дамакъ э, кIилди хье республикайин дамакъра э», - пуне парламентин спикерди. Iуд – хьибу предметариас 95-99 баллар гъушу шиниккварис сертификатар йине Дагъусттандин премьер-министр Магомед Рамазанова. Преми гъушудегьенттарин кьадар хьуне 90 инсан.

Салихат Малагусейнова