Гьалдин дуьйиъ инсанарис джандис зарар девегъилди IуьтIанас ккандея. ХIа пай инсанар вей-вей гъавурдиъ архьая: Iэлеттил алгъудузухаб, сагъвелна, джигьилвелна, хъуссуйин батIарвел ухIас четин идеф.
Амма ппараттарифас чиппи гьемишан Iэле задар атуна, сасра, джандис хайир кеяттар IуьтIанас хъучучIас четин вя. Фи Iэлеф аркьагьан джаллабурис кьабул вереф, агъай гъам кивей авя бабарис. ХIапай шиниккварис багамикестти ке ппара кканеф арджирар э, вахадну ягъари пирогарна сасра уджу итте задар кканди авя. Шуварис пирожкибур, макIарунар, хинкIар, хулаъ акьу бахттабур кканди аве. Миштти идегуна инсанари фикир аркьа: фишттин гIурикес аркьагьан агъай ме Iэлеттар. Къафкъаздиъ ягIар хьуная экIен гIурилас хIеджибугъдайин гIурикес алтухъ хайир кеяф. Ппаратари гьал те гур ппара ишламиш аркьа. Амма гьал аттархьуная уджузди, хъара алтухъ хайир кея джархан гIурихъас алтухъ ягIай адава (Авалара ишламиш аркьафи джархан гIур, амма ппара гагь тихъас кIвалас ушуна).
Джархан гIурин иджвелихъас, гъургъуна, хIуьджат акьуб- нехIякь кар э. Ме гIурик чIире холестерин мертт акьуна, керта бета-глюкан агъа зад кея. Са ягъа ме гIурин 100 гр. гIачихьучин Iэле задаригI, ми кIилин ягъдис гьуркIа В1, РР, В2 витаминар ицIанде. Хумбарис иджи хIисабикк ккидава джархан гIуригI ме витарилас гъайри ацIуна микроэлементар гIаябакес хабарди адава. МигI ппара фосфор, железо, магний, кальций агъа элементар гIая.
Хайирдихъас давай, гикес акьу задарин тIегIямихъас пичин, ме ширин хеварин тIегIям хъая гIудул заддар акьас вере зад э. Нандиъас гъушанас хьасе ме, дикванариъ фачадархьа джархан гIур? Гьал ая «Магазины здорового питания» агъа дикванар, гебур адавайчин, ая, нагагь садихъди 5-10 кг гъуршанхаб, кьимат хъайхьуна ицIан интернет- магазинар.
— Фи э ме гIурикес аркьаф?, — пасе хумбари.
Ке удигьай бусулманарис ккане «Талбин» агъа кушар, лап ширин арджирар, ширин гуни, гIудул шиниккварис кканвере бицIи бахттабур.
Джархан бицIи бахттабур аркьагъилди пасе чин.
Ме бахттабур ппара кьабул хьасе чве хулан хизанарис. Мебур иджи э багамикестти, сивихIанарис IуьтIанас, гаш хье арайи сивиъ агъихьас, экIен гIурин гунин еринди ишламиш акьасра хьасе. Мебур акьас 400 гр джархан, 200 гр пилар гIаттдиву (цельнозерновой) гIурин, 500 гр чIвехI, яра мастт, са чейин ттур судайин, чейин ттур кьел, 50 гр ифалин лазим хьасе.
ГIур, кедадатуна, кьелна судара гIай гура ахъуна, агIатуна эм ая чIвехI ера мастт агIатуна, гIудулди, бицIи гъилик кикъвай суман. 30 дакьикьайи атуна, 6-7 кьатI акьуна, бицIи кIилар аркьа. Ифал кидарку, рийи саджуъ уджуна, кучи ами агьиланде нисихъай е къалмухъ чейихъай.
Тамам Рамазанова
