8-пе сентябрьди, садпегелай акьуне хье хIукуматис герек джалла милатарин чIаларин хIаягъ. Ме ягъ акьас пунаф гьакIанди календарик хIаягъан ягъ кехьурай пуна дава, ме ягъа йиркIурал акьурай пуна э, гьерттин чIал ухIуна кканде пуна э, хабди кегъархьая несиларисра ягIар акьас. Ме ягъ хIаягъ акьасе пуна арайил акьунаф хье хIуькуматин хIаттин буюрмишилди э. Владимир Путина икьрар акьуная 8-пе сентябрьди Дагъусттандин магьшур шаир Расул Гамзатован ху ягъа аркьагъилди ме хIаягъ.

«Расул Гамзатовахъ ху чIалар Iуд хъай уйи — сад учин ху авар чIал, сад Iьурус чIал, ме чIал бадала мин шиирар кIилди дуяйис ягIар хьуне, сад мебурикес «Журавли» э» — пуне хIатти. ЯгIайин ягъа Российиъ ая 270 ху чIаларна диалектар. 64 субъектиъ авадан аркьай гIилмин програмабурилди 76 ху чIалан дарсар ирцIанди ая. Дагъусттан ке ппара милатар ая ус э хье хIукуматиъ. Мисаъ ая 50 чIалалдина диалектарилди гъургъаттар, мебурикес 14 чIал хIекъунинттар пуна арайил акьуная. Мебур э: аварарин, даргибурин, лезгибурин, яхуларин, кумыкарин, табасанарин, агъуларин, рутуларин, ногъаярин, татарин, азербайджанарин, чеченарин, цlахурарин хъара Iуьрусарин чIалар. Дагъусттандин чIалар — мебур Iари гъургъубас дава, мебури агвар аркьа гьер милатин тарих, мебурин гIедатар Амма мебурикес са-са чIалар гуланди ая. Гьеме хIаягъ акьунафра фикир йирай пуна э гьаме кардин читинвелдис, хаб чIал ягIар акьас алучIурай пуна. Ме кар бадала хье республикайиъ ппара кар аркьая кумак йиб бадала ху чIаларис: махьтабариъ дарсар гъая, китабар адихьая, ху чIаларилди лиркIенде газитар, аркьа олимпиадабур Дагъусттандиъ гьер чIаларилди гъургъа пуна ге сад-сайигьас гьаттархьуб дава, ге хье хIуькуматин девлетна баракат э. Гьелбетта гьаме чIаларилас асуллу хьуна миллатарин арабура цIуппе ве, кIилди хIуькуматин садвелна дусттвелра гуджлу ве.

Батитай Габибулаева