27- пе июльди Агъул райондиъ хьуне Дуруштуларин хIурин джемеIетин маджлис. ЯгIайин ягъас ме хIурин инсанар дуламиш вея Дербентский райондин Хазар агъа хIуриъ.
1963-пе иса Совет хIуькумат ая вахттуни ме хIурин инсанар кIилди айчIуна ушуне Дербентский райондиъ ая К. Марксан ттуранихъа совхозиди агьалдингъилди (Хазар) агъа мукьуйиъ. Фас пучин те вахттари сувариъ хIуькуматин курар чукь идехIела мебурис гьучихьуне аранарин хIурин магIишатин курар. Те вахттари Дербентский район лап авадан багълар бусттанар бегьем вере мукь ий. АйчIуна ушучира амма инсанар вей хьуная аларуцас чиппин ватанилди. Джегьиларин кьасттар хьуне джилар узай акьас, амма ме кар фишттира арайил хьундава.
Гьелбетта инсан найич ушучира учин бинайин ватандихъди йиркIв дива. Миштти идегуна Агъул райондин 90 исра хьухIела мебури гьеме иса акьуне чиппин юбилейный 10-пе маджлис. Гьер иса Дуруштул хIурин гьер мукьариъ дуламиш вея инсанар хIаф – бицIиф, хIурин хIа яшдин инсанар гьер хIурин имамар диндин гIилмин гIалимар, мугьлат мункинвел аяттар кIилди завал ве чиппин бинайин мукьуйиди. Ме исара чиппин гIедат идегъилди завал хьуне Дуруштул хIурин инсанар кIвал акьуна чиппин бинайин ватан.
Гьеме кардихъас са Iу суал йине зун Дуруштуларин хIурин яшлу хумбарис.
Мебурин чIаларилди: аранариъ мебурин дуламишвелар айчира, ачухъвелар чиппис айчира, курарин кьитвелра адавайчира, бинайин мукь, дадан ватан мебурис хум вейдава сайисра.
Чин яшамиш давейчира,час кканде че джилил лек ишас кIвал акьас мисалас алайшудегьен че несилар.
Гьалдихъас хабра че кьастт э давам акьас че хIурин маджлис, ягIар акьас че шиниккварис хуттуларис хабдин несиларис, мебурин йиркIвариасра аттадархьас че бинайин ватандин тарих.
Гьер иса ме маджлис арайил аркьай аве Агъул райондин имамарин председатель Курбан Рамазанова.
КIвал акьасе, ме иса маджлис арайил акьуне Мустафаев Маликан ниятилди пулун кумак акьуне Дурштул джемеIтин гьер тухумди,гьелбета аттрукьа кумак акьуне учин багухъасра Мустафаев Малик Мурадалиевичара. Малик Мурадалиев Дуруштуларин хIуринф э, кар аркьая ме Москвайиъ духттурвелди. ЯгIайин ягъас ме Москвайиъ дуламиш вея Агъуларин общинайин Председательра э. Мишттин иджвелин мегIракабур Малик Мустафаева садпугелай дава арайил аркьай.
Гьалдинхабра кьуватна джандин сагъвел йирай мебурис, чиппин йиркIвариъ аядегьен иджвелин курар арайил акьас. Савабар ликIирай чиппис.
Наиба Гасукаева
