Дагъусттандиъ СВО-йин ишттаракчибур хIуькуматин хIа курарихъди хIезур акьас «Доблесть гор» агъа кадровая программа арайил акьуная. Ме кардин бадала республикайин хIатти Сергей Меликова указилас къул дивуна уйи 2025-пе исан 10-пе январьди. Январьдин яI хьу хаб мич э гIерзабур кьабул аркьай. Ме программайилди гIаттиву ишттаракчибур кадровый резервдигI гIачархьуна кардин рекъуьас хурас гьика. Мебурис гьерттис учис хъуьдуьхьу таджриба хъая насихIетчибура гIаттива. Региональный конкурсдин ке зурба, идже ишттаракчибурис республикайиъ курар йисе, е дахьучин «Время героев» агъа федеральный программайин финальный этапиди гьикасе.
«Доблесть гор» агъа программа арайил акьубан джувабдарвел фая главайин администрацивна Дагъусттандин правительствойив. Региондин хIаттин ахттилатарилди, СВО-йин ветеранари агвар аркьа чиппин яхI-намусин кьадмивелра читин вегIдайи курар хIел акьас хьубан рекъуьасра гьунарлувел. Миштти идегуна мебур лап дажиркIен, багьа пешакурар э хIуькуматин идарабуриъ. Специальный военный операцин ишттаракчибурисна ветеранарис аваданвелдин программа Зун хIисабра аркьа, гьучихьайра э «Время героев» агъа федеральный проект хIа акьубан лазимвел, гьемишттин программабур гьер регионариъ фатуб. 2024-пе исан 14-пе декабрьди «Единая Россия» агъа партин ХХII-пе съездил Российин Президент Владимир Путина гьучихьуна уйи гьеме «Время героев» агъа проект хIа акьуна мишттин суман программабур джуре регионариъра дахъуб.
«Зун сагелайна Iугелай дава пеф, дегIви агу инсанарис э ке иджи ягIай авереф дузвелдин, намусин, лайикь иде курарин кьимат. Гьемишттин инсанар джувабдарвел фай хъучаве хIел акьуна ккане суаларихъ, мусра алдетмишра акьасттава чиппихъ эхIттиб хъихьу инсанар. Гьелбетта гьалдин читин вегIдайи фи пучира садпе мукьуйил алве инсандин тарбияйинра адабин шартIар — ватанперасвел, зурбавел, Ватан кканевел. Гьеме шартIар ке Iайи фаве СВО-йин ишттаракчибурив», — пуне Дагъусттан Республикайин хIатти Сергей Меликова. Программайин кьасттар Гьер са кардин гъавурдиъ ая, зурба пешакурар хIезур акьуб дагъусттанагьли СВОйин ишттаракчибурикес, ветеранарикес, хабди кар аркьагъилди Дагъусттан Республикайин хIуькуматин идарабуриъ. Хъара Дагъусттан Республикайин районарин идарабуриъ, хъара джуре усариъра. Сесер йина гIаттива кураригIра мебур гIай кканде, иджи кар ягIаттара джурейи гIаттивуна кканде мебурикес. Магомед Баачилова «Доблесть гор» агъа программа арайил акьуб лап лазим идеф хIисаб аркьа. РД-йин Безопасностин Советин Секретарьдин чIаларилди, ягIайин ягъа Специальный военный операцин ишттаракчибурис ппара кумакна майил ирцIанде. «Ме программа ягIа ппара лазим э, фас пучин, хIа пай кадровый офицерара кехIей гьер джурейин багьанабур хъай, сагъламвелдилас асуллу ий, РФ-дин ВС-буриъ служит акьас давей хулариъ аяттарис идже мугьлат хьасе чиппин гьунарлувел агваракьас хIуькуматин джуре курарилра», — пуне Российин Игити. Магомед Баашилован чIаларилди «Доблесть гор» агъа программа цIае мугьлат э хIа гIилми хуру дипломар фая рядовой сержантарин состависра, прапорщикарисра. «Мебурин хIа паярифас чиппин хуру хIилмин пешайихъ хъуттурфуна батIарди кар акьуна чиппин зурбавел агвар акьас хьасе джуре курарилра», — хъугъуб хъай пуне «Доблесть гор» агъа программайин Общественный советин вакил Магомед Баачилова. РД-йин Общественная палатайин пешакар Уллубий Эрболатова ахъакьуне «Доблесть гор» агъа программайихъас. Ппара лазим э пуне ме руьхIдин цIуппевелна ватанперасвелдин тарбия вартт акьас. Ме программа кумак хьасе тарихдин фикир, садвел, векIехIвелдин тарбия, хъара джувабдарвел ухIубан рекъуьъ. «Доблесть гор» чишналу ишан э руьхIдин цIуппевелдин, яхI — намусин, Ватандис вафалувелдин. Ме майил ирцIанде СВО-йин ишттаракчибурисна ветеранарис, ме кардилди хье джигьиларис дженгеринра джемеIет бадалди лихубан кьимат агвар аркьай. ХIайи фикир йина кканве джигьиларихъай ватанперасвел бадалди гъаре акцибурин кардис, векIехIвелдин дарсарис, ветеранарихъай гьучархьубарис. Эрболатова кIвал акьуне, ме программайи хье республикайин хабдин Iуьмурдин руьхIдин цIуппевелдин шавратI ккийибахъас. Учин хъугъуб хъая пуне микес джемеIетис эхIттиб хъая ирфар хьасе пуна.
Салихат Малагусейнова
