Дагъусттандин здравоохраненин Министерствойи лап хIайи полиомиелитис акси иде туровая вакцинация хъучучIуная. Ме кампанин кьастт джаллабурис хъай вакцинация акьуна ме хатIайин раджар хьехъди рукьас адатуб э.
Вакцинация акьубагI гIачархьа хьибу вазалалас цIеякьу исна цIаса ваз хьасттегьен яшдин шиникквар джалла. Ая мин Iуд этапара: 10-петтилас 14-пе ноябрьдилдегьен, хъара 15-петтилас 19-пе декабрьдилдегьен.
Вакцинацин кампанин мегIрака хъучучIуб бадалди акьу пресс-конференцил, Дагъусттандин здравоохраненин министрдин заместитель Патхула Патхулаева ахъакьуне ме прививкабурин лазимвел фидегьен хIа ичин.
«Шиникквар – ме хье джемеIетин арайиъ ке багьа, багъри нуьгIмат э. Амма ке удигьай гьемишттин чIирхIе раджарна итталар кедишафра бицIиттарис э. Мебурихъ хIа паярихъ цIуппе имунитетар хъайчира, гьелбетта ая сур шиникквар гьер багьанабур хьуна иммунизацибур дакьуттара. Чин чвакес хIа тIалаб аркьая: див хьин ме кардин суалихъ йирк в фай, джувабдарвелилди хъучавес. Фас пучин, ме суал лап хIаф э. Ме раджарин зарара ппара э», — пуне Патхула Патхулаева.
Патхулаеван ахттилатар вакцинация акьасттава агъа дадар бабарис Iекьул ицIанттар э: «Полиэмиелит – ме гьакIан иттал дава, ме лап хIа мусибат э: ме иттали зарар йи шиниккв кIилин Iуьмурди сурхьумарин коляскайиъ ахьасе, е дахьучин ахуниъ ахьасе,салам йигуна гъилра кехIей йис давей. Ме вирус лап хатIайинф э, амма мин удигь багв фацанас ве. Миштти идегуна гьер сад джувабдарвел фай хъучушуна кумак акьуна кканде ме кардин рекъуьъ.
Ке иджи ме полиомиелитин итталигьас ухIуб – вакцинация акьуб э.
Гьалдисттегьенра Российиъра хъара ацIуна джуре хIуькуматариъра вахттуни джаллабури хъай сад хьуна вакцинация аркьай ухIай уйи чиппин джемеIет ме итталин варттал гъалибвел гъуршанди. Амма вехIши полиовирус файдибан хатIалувелра гьемишанди аве. Ме кар хъара читин э хьин дазубур пай аркьа хIела Афганистандинра Пакистандин хIуькуматарихъай. Фас пучин ме хIуькуматариъ кIилинде ме иттал ккедихьас хьуна адава. Ме кара асуллу идеф хьасе белики ме хIуькуматарин халкьдин чIал сад дава хIела».
Хье республикайин джалла районарис ме вакцинайин хабчихишар хъучатуная. Кардин мегIракабура хъучучIуная йицIудпе ноябрьди. Замминистрдин чIаларилди, джемеIетин гъавурдиъ архьавелди мебурин кумакилди худтти кIилира гъая.
Иммунизация гьаваянф э, гьерф уч яшамиш вере усан поликлиникайиди ушуна йирхIас хьасе ме руб. Хъара инсанарис къуллай хьас мишттин пунктар дахъуная махьтабариъ, садикариъра.
Нагагьттан гьемиштти махьтабариъ, садикариъ вакцинация аркьа усариъ чиппис герек иде суаларис джувабар иджи дажикIихаб бабар дадарифас гьучавес хьасе чаб хъукъас акьу поликлиникабуриди. Миштти давайчин мебурифас звонок акьас хьасе горячая линияйиди. Номе джикIес хьасе Минздравдин официальный сайтуниъ.
Дагъусттандин Роспотребнадзордин эпидемиологический отделин хIаф Мурад Рамазановара, хъара Республикайин инфекционный итталаринра СПИД-ин центрдин эпидемиологический отделин хIаф Мурад Гаджива чиппи джуваб ирцIанде пуне гьеме кардис ишламиш аркьа вакцинайин кьадмивелдихъас, хатIасузвелдихъас.
Ахирахъди ме ведомсттвобурин вакилари дадар бабарикес тIалаб акьуне чиппин валадарин сагъламвелдихъ джувабдарвел фай хъучушуб, вахттуни прививка акьуна хье шиникквар, хье джемеIет, хье кегъархьая несилар ме итталикес ухIуб.
КIилди республикайихъай вакцинация хъучучIуная хье Агъул райондиъра. Мисаъ иммунизация фиштти кIили вейчин ахъакьуне ЦРБ-йин поликлиникайин пешакар, Участковая медсестра Гусейнова Хабав Магомедовнайи.
«Магьа 10-пе ноябрьдинхаб хубджи инсанари полиомиелитин прививкабур акьуная. ЯгIа акьу прививкайи багагь хье шиниккварин сагъламвел ухIасе. Гьелбетта ая бицIиди ме рубаригьас ул гьая дадар бабара. Амма итталин Iайвелихъас вакцинайин иджвелихъас ахъакьуна гъавурдиъ ихьугуна мебурис ягIарве ме кардин джувабдарвел.
ХIа пай шиниккварис ушуна махьтабариъ, садикариъ вакцинация акьуне. Вакцинайин Iу джура ая сад джан алеф сасра джан алдаваф. Джан алеф сивиъ агьарта тIинкIар э, гьаме иджира хIисаб аркьа.
Иммунизация акьу шиникквдис багагь ме иттал гьучархьучин михъ учин эхIттият хъахьасе.
ХIуьлматлу зе халкь див хьин хье несиларин сагъламвел бадалди джаллабур сад хьуна мебурин эхIттият ухIас! Шиниккварис иммунизация акьас!», — агъа Хабав Магомедовнайи.
Салихат Малагусейнова
